By Marisol Bo-oc | 09:34 AM March 25, 2024
Patay ang usa 17 anyos nga babae human kini nabanggaan og usa ka motorista nga partisipante sa gipahigayun nga Bohol Loop 2024.
Namatay kini sa ospital matod sa iyang paryente nga nangayug hustisya pinaagi sa social media.
Matud ni Facebook user nga si Mayang Bone Yao, ang iyang ig-agaw namatay tungod sa komplikasyon sa iyang trauma sa aksidente.
Matod sa kapolisan nga ang partisipante sa Bohol Loop nga si Suzette Lacanaria sa dakbayan sa Cagayan de Oro nakabangga ni Ana Marie Tasic sa barangay Badiang, Sikatuna niadtong Sabado, Marso 23, 2024, ang unang adlaw sa Bohol Loop 2024.
Ang kapulisan niingon nga si Tasic nihunong sa usa ka tindahan ug ang mga saksi nibutyag nga si Tasic motabok sa dalan sakay sa iyang motorsiklo dihang si Lacanaria sakay sa iyang motorsiklo mingbangga kaniya.
Daghang mga Bol-anon ang nakasaway ug wala nakauyon sa Bohol Loop 2024. Kusog magpadagan kuno ang mga looper nga maoy nakaingon sa mga disgrasya sa kadalanan.
Kapin sa 3,000 ka partisipante ang ming-apil sa Bohol Loop 2024. Ang mga sikat nga personalidad nga ming-apil sa Bohol Loop 2024 sila si Senador Bato Dela Rosa, Senador JV Ejercito, motovlogger Jet Lee ug Gov. Aris Aumentado.
Matud sa organizer ang Bohol Loop nakatabang kini sa pagpromote sa turismo sa Bohol.
Mabasa sa social media nga gusto nila undangon na kini. Usa sa gusto undangon kini mao si Aumentado.
Wala pay official nga statement ang organizer sa Bohol Loop 2024.
