By Rey Anthony Chiu | 07:22 PM January 31, 2024
Nanumpa atubangan ni Gobernador Aris Aumentado si City Councilor Nicanor Besas, human nahinog ang kasabutan nga term sharing sa pwesto sa sectoral representation sa mga Konsehal ngadto sa Sangguniang Panlalawigan (SP).
Nanumpa sulod sa buhatan ni Gob Aumentado si Besas, sinaksihan usab sa iyang banay, ug pipila ka mga opisyales ug empleyado sa Kapitolyo.
Kahinumduman nga pinaagi sa kasabutan sa Term Sharing nga gitugot usab ug gisaksihan sa mga opisyales, gisabutan nila ni Kagawad Gloria Gementiza sa lungsod sa San Isidro ug ni Besas, kinsa napili nga City Councilor sa syudad sa Tagbilaran, nga magtunga na lamang sa termino nga alagaran sa Sangguniang Panlalawigan, alang sa walay hasul nga pangalagad.
Karon na ang tungatunga sa termino sa mga napili nga opisyal, hinungdan nga sa kasabutan, mikanaug na si Gementiza aron makahulip na usab sa iyang nahibilin nga termino si Besas.
Ang bag-ong representante sa Philippine Councilors League sa SP sa Bohol hinuon, dili na ihalas sa pwesto.
Sa wala pa mapili nga City Councilor sa Tagbilaran, si Besas mikompleto sa tulo ka termino sa siyam ka tuig nga wala mapilde, isip Barangay Chairman sa Cogon District, ang labing daku nga distrito sa Tagbilaran City.
Matud ni Gob Aumentado, nagtuo siya nga dako kayo og ikatabang ang kasinatian ni Besas sa pagka Kapitan sa iya unya nga gimbuhaton sa Sangguniang Panlalawigan.
Si Besas, amahan ni Kongresista Alexie Tutor, kinsa usab una nga nahimong Board Member sa Bohol.
Sa Pebrero 6, unang adlaw nga moatender si Besas sa sesyon sa Sangguniang Panlalawigan, samtang gipaabut nga may dyutay nga pag-usab s amga committee chairmanships sa SP.
Si kanhi BM Gementiza maoy nagdala sa SP Committee on Women, nga tataw nga dili mohaum ni Besas dala na sa may ubang mga babaye nga board members usab. (PIABohol)
