By Rey Anthony Chiu | 07:03 PM January 22, 2024
Sa hugot nga suporta sa Mayor, mga opisyales sa lungsod ug sa mga katawhan, nakab-ot sa Baclayon ang labing hawod nga lugsod sa kampanya batok sa mga tawo nga gipangita sa balaod aron manubag sa ilang mga atrsao sa balaod.
Personal nga gitumbok ni Police Captain Girlie Apolinares Tolop and tabang sa lungsod aron ma-engganyo ang mga kapolisan sa lungsod sa paglihok sa paggukod sa mga nalista nga Most Wanted Personalities (MWP) ug Other Wanted Personalities (OWP) alang sa 2023.
Nangharos ang Baclayon Municipal Police Station alang sa Type C Category sa tinuig nga tandiay sa Accomplishment Reports sa Bohol Provincial Police Office.
Sa tibuok tuig, gitaho ni Capt Tolop ang 22 ka mga wanted persons nga ilang nasikop: 6 niini nasulod sa most wanted persons ug laing 16 ang nahisulod sa listahan sa kapolisan sa other wanted persons.
Kining tanan nahitabo sa 21 ka mga operations nga ilang gipahigayon, matud ni Capt Tolop.
Kini nga recognition dili mahitabo kon wala ang tibuok nga suporta ug paggiya sa mga opisyales sa LGU Baclayon pinangulohan ni Mayor Atty A Alvin J Uy, dayag ni Tolop. .
Gawas sa Baclayon, nagsunod ang Buenavista Police Station nga mipokot sa 20 ka mga tawo nga gipangitan sa mga tinugyanan sa balaod.
Sa kaso sa Buenavista,sa 20 ka operations sa tibuok tuig, 9 ka MWP ang ilang nahipos samtang 11 usab ang mga other wanted persons nga naposasan.
Sa Clarin, sa 18 ka operations, 8 ka MWP ang ilang nakuha ug lain pang 11 ka OWP ang nakuha.
Ika upat ang Maribojoc Police Station sa kampanya human sa 12 ka buwan, nakahimo kini og 18 ka operasyon: 2 ka MWP ang nadakpan ug 16 ka OWP ang napaatubang sa ilang mga salaud.
Ika lima ang San Miguel nga nakahimo og 18 ka operations unya nakadakop sa 3 ka MWP ug 15 ka OWP.
