By PR | 11:44 AM December 20, 2023 – revised
P5.5 milyun ang kantidad nga tabang nga gitunol sa kagamhanang probinsyal ngadto sa LGU Buenavista ug sa duha ka people’s organizations (POs) sa mao nga lungsod.
Pinangulohan mismo ni Gobernador Erico Aristotle Aumentado ang gihimo nga turn-over Disyembre 19 sa Barangay Lusong.
Ubos sa Livelihood Development Assistance Program, gitunol sa Provincial Cooperative Development Office (PCDO) ang kantidad nga P227,708 ngadto sa Catigbian Waterworks and Sanitation Association (CAWSA) ug P249,650 ngadto sa Lusong United Farmers Association (LUFA) alang sa ilang proyekto nga agrivet supply retailing.
Sa 38 ka mga POs nga nisumitir sa ilang project proposal, ang duha ka mga asosasyon maoy mga pinakaunang nakadawat sa maong grant sa tibuok probinsya.
Atol sa turn-over ceremony sa Barangay Lusong, gipahinumduman ang mga benepisyaryo sa dakong importansya sa maong ayuda aron matagad ang panginahanglanon sa mga miyembro ug sa tibuok komunidad.
Nagpadayag sa iyang kalipay si Buneavista Mayor Dave Duallo sa nadawat nga grasya alang sa CAWSA ug LUFA, ilabi na nga gapakita kini sa gugma sa gobernador ug sa tibuok kagamhanang probinsyal alang sa mga kabus.
Namahayag usab si PCDO Head Ma. Conrada Fuentes, hepe sa PCDO ug executive assistant Romeo Teruel nga “marching order” ni Aumentado ang pag-atiman dili lamang sa mga kooperatoba, apan lakip na usab ang mga asosasyon ug paminawon ang panginahanglanon sa mga miyembro niini aron ma-improve pa ang kahimtang sa katilingban.
Sa iyang kabahin, si Aumentado nagkananyon nga kanunay ang pagpaningkamot sa kagamhanang probinsyal aron matubag ang kapobrehon sa daghang mga dapit sa Bohol.
Dugang pa niya, ang paghatag og tabang ngadto sa nagkadaiyang mga asosasyon usa sa mga pamaagi aron tubagon kini.
Gipahinumduman usab ni Aumentado ang tanan sa importansya sa edukasyon aron mahaw-as ang mga kabatan-onan gikan sa kalisod, uban ang iyang pasalig sa hugot nga suporta alang sa mga poverty reduction projects.
Isip representante sa duha ka mga asosasyon, nagpasalamat si Jomar Estorgio sa CAWSA ug Danilo Suello sa LUFA sa ilang nadawat nga tabang ug nisaad nga ilang atimanon ug palamboon ang ilang nadawat na pondo.
Sa maong kalihukan, giturn-over usab ngadto sa kagamhanan sa Buenavista ang bahin niini sa collection sa sand and gravel nga nagkantidad og P90,000 alang sa mga buwan sa Enero ngadto sa Marso ning tuig ug ang pinansyal na ayuda nga nagkantidad og P5,000,000 alang sa road concreting projects.
Gitambongan usab kini ni SB Secretary Mario Añabiesa (isip representante ni Vice Mayor Elsa Tirol), Barangay Kapitan Apolinario Ceniza sa Lusong, Barangay Kapitan Cira Membreve sa Catigbian, ug uban pa nga mga opisyales gikan sa probinsyal ug lokal na mga panggamhanan ug duha ka mga asosasyon. (PIMO/GO-ESS JJA)
