By PR | 10:03 AM December 15, 2023
Nakadawat og pinaskuhan ang lalawigan dihang mitunol og P3 milyones ang Bohol Water Utilities Inc. (BWUI) ngadto kang Gobernador Erico Aristotle Aumentado isip dibidendo sa kagamhanang probinsyal.
Personal nga giatubang ni Aumentado ang mga opisyales sa BWUI nga nibisita sa iyang buhatan sa kapitolyo Disyembre 13.
Si Marnelli Bautista, general manager sa BWUI, nagkanayon nga ang ilang katuyuan sa pakigkita sa gobernador mao ang paghatod sa dibedindo alang sa lalawigan gikan sa gipanag-iya niini nga shares sa BWUI.
Nikabat og P3M ang dibedindo sibo sa 30% nga bahin niini sulod sa nanglabay nga mga tuig.
Sa iyang bahin, nagpasalamat si Aumentado ngadto sa BWUI sa pagpaningkamot niini nga makahatag sa bahin sa kagamhanan.
Si Victor Tambis, compliance officer sa BWUI, nipasabot nga sumala sa substantial agreement ang BWUI muhatag sa pangagamhanan og dibedindo nga tugbang sa 30% share sa ilang kita matag tuig.
Nasayran nga ang maong lakang paghatag sa bahin sa lalawigan, aprobado sa ilang board meeting niadtong Nobyembre 30.
Saksi sa maong turn-over sila provincial administrator Asteria Caberte, manlalaban Filipina Piollo, chief of staff, ug si Dominic Butalid, presidente sa Bohol Chamber of Commerce and Industry.
Sa panid sa BWUI, uban kang Bautista ang finance manager Christine Ranay, operations manager Clement George Chiu, engineering manager Conrado Melisimo ug secretary Stacy Ann Villamala ug si Tambis.
Nagpadayag si Aumentado sa iyang pagpasalamat sa ngalan sa lalawigan ngadto sa BWUI. PIMO/ALT
