By PR | 10:38 AM December 13, 2023
Gitambongan ni Gobernador Erico Aristotle Aumentado ang groundbreaking ceremony sa pagtukod sa Multi-Species Freshwater Fish Hatchery and Nursery sa Bilar campus sa Bohol Island State University (BISU) niadtong Disyembre 12.
Atol sa maong tigum, gipirmahan usab ang memorandum of agreement (MOA) ingon man ang seremonyas time capsule laying sa maong proyekto.
Kini human ang makuti nga pagtuon sa komitiba ug ang delibersaryon sa Sangguniang Panlalawigan (SP) ubos sa direktiba sa gobernador.
Kahinumduman nga niadtong Septyembre 7, naumol ang mga resolusyon sa SP nga naghatag og awtoridad sa gobernador paglagda sa mga kasabutan bahin sa implementasyon sa nahisgutan nga hatchery ug nursery.
Ang Resolution No.2023-820 sa SP naglagda sa pagtambayayong sa kagamhanang probinsyal ug BISU Bilar pagtukod sa usa ka hatchery ug nursery sa mga isda sa tubig nga tab-ang.
Pinaagi niini, makahimo ang mga estudyante paggamit sa proyekto alang sa ilang lawm nga mga pagtuon o research nga libre. Sundon lang nila ang lagda subay sa maong resolution alang sa kahapsay sa ilang pagtuon.
Tumong sa partnership nga pangusgan ang mga lakang pagpadaghan sa tinubdan sa isda aron makatabang kini pagpakunhod sa presyo sa isda. Dungan niini ang tinguha nga matabangan usab ang mga mangisdaay nga benepisyaryo sa programa.
Sumala sa MOA, 90% sa kinatibuk-ang abot sa proyekto mupaingon sa kagamhanang probinsyal alang sa mga benepisyaryo nga mananagat ug ang nabiling 10% gahin sa BISU Bilar alang sa ilang kaugalingong mga programa.
Ang maong MOA gipirmahan ni Aumentado isip representante sa kagamhanang probinsyal ug ni Dr. Anthony Penaso, representante sa tunghaan isip university president.
Sa laing bahin, gidungan sa maong kalihukan ang turn-over ceremony sa P1.5 milyones nga ayuda sa kagamhanang probinsyal ngadto sa lungsd sa Valencia nga gidawat ni Valencia Mayor Dionisio Neil Balite ug laing P1.5M alang sa Pilar nga gidawat usab ni Pilar Mayor Wilson Pajo.
Ang maong mga ayuda may kalabutan sa gikatugyan usab ngadto sa maong mga munisipalidad nga tilapia hatchery facility sa barangay Marawis, Valencia ug barangay Cagawasan, Pilar.
Ang MOA bahin niini ubos sa pagtugot pinaagi sa Resolution No. 2023-819 nga pirmado usab sa Bureau of Fisheries and Aquatic Resources( BFAR) 7, ug sa mga hingtungdang hingtungdan kagamhanang lokal.
Ang mga nahisgutan nga resolusyon gipangamahanan ni Bokal Nathaniel Binlod uban ni Bokal Lucille Lagunay.
Gipahigayon usab sa maong okasyon ang ground breaking ceremony sa Bohol Soil and Water Laboratory.
Si Aumentado nagkanayon nga nahimong katumanan ang iyang tinguha bahin niini, tungod sa suporta sa DA-RFO VII sa liderato ni Angel Enriquez, ug girepresentahan niadtong adlawa ni Engr. Cirilo Namoc RTD for Operations, SP uban ni Bise Gobernador Dionisio Victor Balite, Office of the Provincial Agriculturist, BFAR ug sa BISU Bilar.
Apil usab sa maong kalihukan ang mga tinugyanan sa fishery sector nga sila si Engr. Ricardo Oblena, Alfeo Piloton ug Salvio Madanguit uban ni Nunila Pinat, Liza Quirog, provincial agriculturist; Marietta Macalolot, campus director; Eleno Evangelista, aquaculture tech-1 ug ang College of Agriculture and Natural Resources.
Nanawagan si Aumentado nga padayonon ug magpursigi ang pagtinabangay sa pagpakigbatok sa kapobrehon ug kab-uton sa kanunay ang kalamboan. PIMO/ ALT
