By PR | 07:05 PM November 07, 2023
Nagpadayon ang kagamhanan probinsyal sa serye sa mga workshop uban ang nagkalain-laing mga stakeholder nga uyon sa Bohol Regenerative Island Project aron tutokan ang tumong nga mahiuyon ang negosyo sa ilang adbokasiya.
Gipahigayon niadtong Nobiyembre 7 sa New Capitol Building.
Ang maong kalihokan nga gipahigayon Nobyembre 7-9 sa kapitolyo kabahin sa Bohol Island Regenerative Project nga gitambongan sa nagkalain-laing stakeholders kinsa gilantaw nga maoy mopasiugda sa regenerative practices aron usab matabangan ang pagpalagsik sa kinaiyahan.
Nakigtagbo si Architect Marianne Therese Amores Dutta, founder ug director sa Regenesis Project, sa mga magpapatigayon sa lalawigan aron hisgotan ang pagpasibo sa mga kalihokan sa negosyo, gikan sa agrikultura, imprastraktura, hospitality, ug turismo ngadto regenerative practices.
Nagkanayon si Dutta nga kinahanglang adunay lig-on nga paningkamot gikan sa maong sektor sa pagsagop sa mga regenerative models nga makatabang sa pagpabuhi sa natural resources sa Bohol sa ilang mga negosyo, ilabi na sa ilang mga kalihukan sa corporate social responsibility aron pagtubag sa mga problema sa ekolohiya sa probinsiya.
Siya nanghinaut nga ang lalawigan mahimong mabinantayon sa mga investment nga mosulod sa Bohol nga makadaot ug maglantaw sa malungtaron ug mahigalaon sa kinaiyahan nga mga investment nga mahimo usab nga makamugna og higayon nga mapanalipdan ang kinaiyahan.
Ang Bohol Regenerative Island gilauman nga usa ka dekada nga proyekto nga gilusad sayo ning tuiga pinaagi sa Executive Order nga gipirmahan ni Gov. Aris Aumentado.
Duna kini unom ka bahin: (a) water security and watershed restoration, (b) ecosystem restoration and climate resilience, (c) food security, (d) regenerative tourism, (e) education, youth and civil society, ug (f) investment and commerce.
Sumala sa katuyoan sa maong proyekto, kini nagtinguha sa pagpalambo sa biodiversity, himsog nga kalikopan ug lig-on nga mga komunidad nga makigbatok sa mga hulga sama sa climate crisis nga mitumaw karon. (PIMO/GMC)
