By Ric Obedencio | 07:00 PM February 17, 2023
Si Bise-Gob. Victor Balite nagbutyag nga ang national assembly sa tanang bise-gobernador sa nasud sakop sa League of Vice Governors of the Philippines (LVGP) ilusad sa Bohol sa umaabot Marso 2-4, 2023.
Kini iyang gipalanog atol sa interview kaniya sa media gahapon human makahukom ang executive committee sa liga nga sa Bohol himoon ang tinuig nga kalihokan sa mga bise-gobernador.
Matud ni Balite, kinsa mao ang LVGP director alang sa Central Visayas, wala siya mobalibad sa plano sa ilang komitiba kalabot sa kalihokang national assembly.
Gidahum ni Balite nga adunay mga 80 ka mga lalawigan nga paga-representahan sa ilang tagsa-tagsa ka bise-gobernador nga motambong sa maong kalaihokan.
Ang Bohol mahimong mao ang “host” sa nahisgotang kalihokan nga mahimo usab kini usa ka lakang sa pagpakaylap sa Bohol isip usa ka “tourist destination,” si Balite nagkanayon.
Dili lang mga bise-gobernador ang posibleng mo-ari sa Bohol atol sa asembliya, kon di, lakip ang ilang mga pamilya, siya midugang.
Si Arnaldo “Arnell” Ignacio, administrator sa Overseas Workers Welfare Administration (OWWA) ug uban nga mga dinapit nga mga bisita nga motambong sa national assembly.
Ug sama sa naandan, ang LVGP mohisgot sa mga butang nga may kalabotan sa ilang kaakohan, sama sa palisiya sa pamalaod ug uban pa.
Si Balite midugang sa pagbutyag nga ang iyang sakop sa buhatan nangandam na, sama sa “coordination” tali kanila ug sa executive committee, alang niini. Iya usab nga gipaapil ang ubang mga ahensiya alang sa siguridad sa mga bisita.
Kon mahinumduman, si kanhi Bise-Gob. Julius Caesar F. Herrera, karon mayor sa Calape, Bohol, napiling president sa LVGP sa tulo ka termino (2001-2010). (rvo)