By PR | 09:18 PM February 17, 2023
Opisyal nga giablihan sa Kagamhanang Probinsyal ang Botika sa Kapitolyo ug Capitol Medical Clinic, Pebrero 14, 2023 isip kabahin sa selebrasyon sa Love Month.
Tumong sa Kagamhanang Probinsyal nga maipaabot ngadto sa publiko ang dako nga gugma sa Administrasyon Aumentado-Balite sa paghatod sa mga nag-unang serbisyong panlawas ngadto sa katawhang Bol-anon.
Bisan sa maulan nga kabuntagon apan malampuson ang pagpahigayon niini nga gisugdan sa Ribbon-Cutting.
Gipanguluhan ni Fr. Israel Augosto ang Blessing Ceremony nga gitambungan usab nila Gobernador Erico Aris Aumentado, Provincial Administrator Aster Caberte, Executive Assistant Metodio “John” Maraguinot, and Bohol Provincial Employees League (BOPEL) president Susan Datahan.
Sumala pa ni Maraguinot, supervising administrative officer, kini nga proyekto bunga sa hiniusang tinabangay sa Governor’s Office-Special Projects Section, Provincial Health Office ug BOPEL, aron mas daghang mga indigents ang makabenepisyo sa mga tambal nga gidonar alang sa mga medical missions.
“Kini gitukod aron mapakusgan pa ang atong paghatag og serbisyo medikal sa katawhan ug mahatagan og pagtagad ang kalawasan sa mga trabahante sa Kagamhanang Probinsyal,” matud ni Aumentado sa iyang mensahe.
Matud ni Aumentado ang maong botika para sa kadaghanan ilabi na sa mga nanarbaho sa Kapitolyo ug sa mga higalang indigent na nanginahanglan og tambal.
” Dad-a lang ang inyong reseta aron mahatagan ug referral sa Constituency Services Section (CSS) na nahimutang sa Ground Floor sa atong Kapitolyo. Kung nawala o nahibilin ang reseta, pwede nga mangayo og reseta sa Capitol Medical Clinic aron mahatagan usab og referral sa CSS, ” dugang ni Aumentado.
Ning paagiha ang mga empleyado sa kapitolyo nga magkinahanglan sa emergency response tungod sa ilang problemang panlawas, panahon sa ilang trabaho, dali nga makapakonsulta sa clinic ug mahatagan og tambal sa botika.
Pinaagi sa kasaligan nga software nga gipahiluna sa BICTO makab-ot usab ang standard management and accountability niining maong mga tambal.
Human magpakonsulta, gikinahanglan lang muadto sa buhatan sa Constituency Services Section(CSS) sa Ground Floor sa kapitolyo, alang sa referral note aron mahatagan og libreng tambal sa botika. Kini kinahanglanon alang sa hapsay nga inventory sa mga tambal.
Ang Botika sa Kapitolyo ug Capitol Medical Clinic anaa mahimutang sa karaang DPWH Bldg. kilid sa New Provincial Capitol, Dakbayan sa Tagbilaran.
Atol sa maong launching, gipaabot sa gobernador ang pagtimbaya og Happy Valentines sa tanang mga Bol-anon ug ang iyang pahalipay sa malampusong proyekto sa Kagamhanang Probinsyal.
