By Ric Obedencio | 08:42 PM January 09, 2023
Walay nadawat nga mga stuffed-toys ang kabataan sa lungsod sa Guindulman niadtong Three Kings human gipangkawat kini.
Ang mga stuffed-toy gidayan-dayan kini sa 65-foot Christmas tree nga maoy kinatas-an sa tibuok probinsya sa Bohol.
Ang imbstigasyon sa kawat niadtong Disyembre 30, 2022 sa mga dayan-dayan sa Christmas tree nagpadayon bisan pa og nailhan na ang mga suspect, matud ni Mayor Ben Balo sa iyang Facebook post.
“Padayun kita sa pag-imbistigar sa mga panghitabo kabahin sa atoang Christmas Tree kauban sa atoang kapulisan ug sa committeeba, atong gitagaan ug aksyon kini nga insidente,” matud sa Mayor.
Matud niya nga gipatawag na ang mga suspect nga nailhan “nga mga nangkatkat sa atong Christmas Tree niadtong December 30, 2022 sa gabie.”
Ang mayor midugang sa pag-ingon, “Manghinaut ko nga dili na kini mausab pa ug magbalantayon kita sa kanunay sa atong palibot.”
Matud ni Balo nga gipanamastamasan ang Christmas tree nga makahatag unta sa kalipay sa mga bata sa Enero 6, 2023. Ug siya nagmulo tungod kay ang mga donor gawas sa nasud naghatag sa naasoyng Christmas tree.
“Dakong piligro ang pagkawat og pagkatkat sa atong Christmas Tree tungod kay naa kini kuryente ug simbako adunay na disgrasya, kini daku nga tulubagon sa Lungsod, hilabi na nako isip Mayor. Literal kini nga gipangkawat ug gibinuangan sa mga tawo nga muguba sa atong gipaningkamutan.”
Ang mayor mitanyag sa mga tawo nga makahatag sa impormasyon nga makatudlo sa mga responsible sa pagpasipala sa christmas adunay reward. With a report from Helen Castano
