By Rey Anthony Chiu | 11:59 AM December 19, 2022

Mingsaka ug dul-an na sa 1,000 ka porsyento ang kaso sa dengue sa Bohol subay sa gitaho sa mga disease reporting units gikan sa Enero nadto sa Nobyembre 20 niining tuig.

Kini maoy gipaambit ni Leonidad Saniel, nurse sa Provincial Health Office (PHO) ug dengue coordinator sa Bohol, atul sa Kapihan sa PIA, niining semanaha.

Sa 2447 ka kaso nga natala sa unang 11 ka buwan, kini 987.6% na nga pagsulbong kon itandi sa 225 ka kaso lamang sa milabay nga tuig, matud ni Saniel, kinsa nag-aghat sa mga local nga kagamhanan sa pagsagop na sa ordinansa sa lalawigan kabahin sa pagsumpo sa sakit nga gikan sa pinaakan sa lamok.

Hinuon, parehas nga us aka kinabuhi ang gikuha sa dengue sa 2021 ug sa 2022.

Sa kasayuran nga gipaambit sa PHO, nakita nga nakasapong gayud sa 120 ka kaso nga gidudahang dengue siadtong morbidity week 22, samtang nagpabilin kining tag-as pa gihapon sa morbidity weeks sa Hulyo hangtud nga hinay nga mingkanaug apan delikado pa gihapon, ilabi na kay ang lamok nga kinaingnan sa dengue, namatikdan nga dili na morespeto sa tiuwan ug mas grabe na hinuon sa panahon sa ting–init.

Tungod niini, gisugyot sa PHO pinaagi ni Saniel nga kinahanglan pa gihapon ang lapad nga pagpakatap sa kasayuran ngadto sa matag purok, ang pagpabuhi og balik sa Purok Dengue task Force aron mahibalik ang regular nga pagsuhid sa mga kabalayan aron mapatuman ang panalipod batok sa dengue ug ubang mga sakit.

Namatikdan usab sa PHO nga may mga kalungsuran pa nga wapa makasagop sa ordinansa batok sa dengue, mao nga wala motrabaho ang mga Purok Dengue task Force.

Sugyot sa mga tinugyanan, ayaw isalikway ang 4S batok sa dengue, ug magtinabangay ang tanan aron ang dengue malikayan. (RAHC/PIA_7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: