By Rey Anthony Chiu | 07:46 PM September 19, 2022
Aron sa sayo nga pag-ila sa sakit ug paglikay sa kamatayon, gitanyag sa local nga kagamhanan sa San Miguel ubos sa pagpanguna ni Mayor Ian Gil Mendez ang libre nga mobile Chest x-ray alang sa tanang molupyo sa lungsod.
Ang libre nga serbisyo gipunting ngadto sa mga mahimong nakaduol sa mga pasyente sa tuberculosis (TB), kadtong mga dali rang matakdan kay ubos ang ilang panalipod sa lawas, kadtong may mga timailhan na sa sakit, kadtong may ubo nga nagbalik-balid sa kapin sa duha na ka semana, nagsugpa ug nagluwa og dugo, apil na kadtong naghuot ang dughan, naglisud og ginhawa, walay gana mokaon, nagka-ubos ang timbang ug minghugo, ug dali rang kapoyon ug hangakon, matud pa ni Jim Reposposa, nurse sa lungsod sa San Miguel.
Ang tanang nahisgutan nga mga simtomas, timailhan usab sa possile nga pagkasakit sa TB.
Ang tuberculosis o (TB) mahitabo tungod sa pagsulod sa lawas sa tawo sa kagaw nga gihinganlan og mycobacterium tuberculosis.
Ang TB kasagaran nga moatake sa baga, apan may mga higayon nga ang kagaw sa TB, miabut na sa bato, sa dugokan ug sa utok.
Tungod kay dili tanan nga matakboyan sa kagaw sa TB magkasakit, gikinahanglan ang sayo nga pagmatikod sa kagaw nga naa sa lawas kay kon malangay, kasagarang magrabehan sa TB, itukmod sa kamatayon, dayag ni Reposposa.
Ug sanglit ang labing dali nga pag-ila sa TB, mao man ang pagtan-aw sa baga sa usa ka tawo, ang mobile free Xray maoy nakit-an nga solusyon sa lungsod aron makaserbisyo sa katawhan.
“Ato gyud ni nga girequest ni DOH7 Regional Director Jaime Bernadas, ug mapasalamaton kita nga gitubag kita sa lungsod sa atong hangyo, dugang ni Reposposa.
Wala nay daghang requirement nga kinahanglan pang dalhon, pasalig sa mga tinugyanan sa lungsod.
Una na unta nga gitagana alang sa Buwan sa Baga, ang libre nga mobile chest Xray, naguyod lang sa lungsod human mipadayag ang Department of Health Region 7 nga puno na ang schedule sa maong pasilidad niadtong Agosto.
Nauwahi man ang pag-abut, malipayon pa gihapon ang mga taga San Miguel, kinsa mahatagan na og katin-awan ug mahiluna na unya sa pagkasayud sa ilang kahimtang kon hisgutan ang makamatay nga sakit.
Segun sa kasayuran gikan sa lungsod, ang libre nga chest XRay gisponsoran sa Maranao People’s Development Center sa pagpakig-alayon sa Philippine Business For Social Progress.
Tungod niini, napahiluna usab ang lima ka adlaw nga ang mobile team sa DOH 7 maghatag sa libre nga chest xray.
Niadtong Septembre 19, ang mobile chest xray miparking sa Poblacion Cultural Center aron makahatags a serbisyo sa mga taga San Jose, Sand Isidro, Cabagnahan ug Capayas.
Sa Septembre 20, moadto na usab ang mobile xray team sa Cambangay Norte, aron makaalagad usab sa mga taga Hagbuyo, Bayongan ug San Vicente.
Sa Miyerkoles, September 21, adto moparking ang mobile chest xray team sa Corazon ug ang mga taga Bugang, adto na didto masilbihan.
Inig ka Huwebes, Septembre 22, ang team moadto sa Barangay Tomoc aron usab makahatag sa libreng serbisyo sa taga Barangay Garcia ug Caluasan.
Sa Byernes pohon, moadto na usab ang team sa Barangay Mahayag aron moserbisyo sa mga taga didto ug sa mga taga Santo Nino, Kagawasan, ug Camanaga. (RAHC/PIA-7/Bohol)
