By J. Jala | 07:05 PM October 30, 2022
Sikop ang usa ka giilang high value target listed personality atol sa gikasang drug buy-bust operation sa Barangay San Isidro, Purok 3, Tagbilaran City, Bohol, pasado alas 10:20 sa buntag, Oktubre 30, 2022.
Ang maong dinakpan giila nga si Homer Guimalan, 50, ug residente sa Atisola Compund, Barangay Cogon, Tagbilaran City.
Si Guimalan kanhi usa ka seaman nga niadtong 2017 nadakpan usab sa pagmaligya og shabu.
Nakuha gikan sa suspek ang mutimbang kapin kun kulang 15 gramos nga gituohang shabu ug mubalor sa kantidad nga P102,000, kalibre 22 Black revolver og adunay sulod na duwa ka buhing nga bala.
Gihimo sa mga operatiba sa kapulisan sa Tagbilaran City Police Station nga pinanguluhan ni Lt. Justeofino Hinlayagan ubos sa direktang pagdumala ni Lt. Col. Regie Real.
Naa karun sa Tagbilaran City Police Station maong dinakpan ug posibleng mapasakaan ug mga kasong paglapas sa sections 5 and 11, Article II sa RA 9165 og RA 10591 (Illegal possession of firearms and ammunition).
Samtang nadakpan usab sa kapulisan kagahapon, Oktubre 29, si John Dexter Tampipi, 21, taga Barangay Booy, Tagbilaran City, kagahapon.
Mokabat sa gibanabana P136,000 sa gidudahang shabu ang nakumpiska atol sa gihimong buybust sa Barangay Cabawan.
Ang malampusong pagdakop pinaagi sa Tagbilaran City Police Station maoy pruweba sa padayong paningkamot sa mga otoridad nga masikop ang tanang personalidad nga nagpaluyo sa illegal drug trade.