Wala nay kapasidad ang CPP-NPA dinhi – 47IB

By Rey Anthony Chiu | 04:20 PM September 28, 2022

Napulo na lamang ka armado ug 11 ka armas ang nahibilin sa mga Communist Peoples Party New People’s Army (CPP-NPA), ug wala nay kapasidad nga magsugod og kasamok.

Kini maoy gitaho sa mga tinugyanan sa 47th Infantry Batallion kinsa maoy nagtutok sa internal security operations sa lalawigan sa Bohol.

Didto sa sinemana nga Capitol Reports kabahin sa Peace ug Security sa Lalawigan, gibutyag sa 47IB pinaagi sa ilang Executive Officer nga si Major Jason Torino nga subay sa periodic reports status sa Bohol, gikan sa 18 ka armadong rebelde sa Bohol, 10 na lang sila karon.

As far as Bohol security is concerned, Bohol is almost insurgency free, butyag ni Maj Torino didto sa media forum.

Gani, sambat ni Bohol Police Provincial Director Osmundo Salibo, ang sitwasyon sa Bohol base sa Joint Letter Directive sa hepe sa Philippine national Police ug sa hepe sa Armed Forces of the Philippines, nabungkag na ang mga NPA sa Bohol ug wala na sila isipa nga hulga.

Gitumbok ni Col Salibo nga kon daghan pa ang mga NPA, ngano nga wala na may mga serbisyo samga kabarangayan nga napugngan pa sa mga hulga?

Ug sa ingon niini nga katikaran, mipalubad na usab ang mga tinugyanan sa Bohol sa modus nga gipakatag aron lamang makapangilad ug makapaninapi ang mga kriminal.

Usa ka text ug call ang napauso karon sa Bohol, nga gikan kuno sa usa ka Kumander Regor nga miangkon nga sakop Apolonio Mendoza Command, nga kuno, nag-operate sa may Tubigon Bohol.

Gitataw sa mga militar nga walay giingong Apolonio Mendoza Command ug gamagama lamang kini.

Sa Tubigon Bohol usab nagkampo ang mga sundawo nga sakop sa Army Engineering Batallion, samtang nagkatag na usab ang signal sa cellphone didto mao nga sayon na lang isumbong ang mga katingad-ang tawo.

Ang style sa text o tawag sa magpaila nga Kumander Regor, nga mangayo sila og kwarta bugti sa kinabuhi sa usa ka sakop sa pamilya.

Ang kwarta, kinahanglan nga ipadala pinaagi sa Palawan o GCash, ug ipadala dayun aron mapugngan pa ang pagpatay sa sakop sa pamilya.

Wala na’y kapasidad ang mga rebelde sa pagpaghadlok, ug kon aduna may ingon niini nga hitabo, hibaw-I nga kini mugna lamang sa mga criminal nga bout maninapi sa sayun nga paagi, matud pa sa mga tinugyanan sa Bohol.

Niining tanan, si Executive Assistant sa gobernador Evangelista, milangkob sa pag-anunsyo nga normal ang sitwasyon sa kahusay ug kalinaw sa Bohol ug ang sitwasyon, kaya ra nga dumalahon. (rahc/PIA-7/Bohol)

Leave a Reply

%d bloggers like this: