By Rey Anthony Chiu | 09:18 AM September 01, 2022
Sa unang walo ka buwan, samtang nagpadayon pa gihapon nga gisamok sa mga aksidente sa kadalanan nga maoy kina-ingnan sa sa pagkadaut sa kabtangan ug kinabuhi, mipakita og maayong record ang lungsod sa Trinidad, Loay ug Talibon.
Kining nga lungsod nga nahi-apil sa top 10 nga kalungsuran nga may labing daghang traffic related incidents (TRI) sa 2021, mipakita og mas maayong records sa 2022.
Ang Trinidad, sa 2021, may natala nga 58 ka kaso sa aksidente sa kadalanan. Karong tuiga, napun-an lamang ang mga aksidente nga natala didto og 5, dihang miabut na sa 63 ka aksidente sa kadalanan ang natala didto hangtud Agosto 24.
Sa Loay, may 50 ka kaso sa aksidente sa kadalanan ang natala sa 2021. Pagka sunod tuig, 2022, napun-an lamang kini og 8 kay natala hangtud Agosto 24 ang 58 ka TRI.
Ang Talibon mingtala og 89 ka kaso sa miaging tuig. Karon, napun-an lamang kini og 9 ka kaso hangtud sa ikaduhang semana sa Agosto, kanus-a anaa na sa 98 ka kaso sa disgrasya ang natala didto.
Gitumbok sa Bohol Provincial Police Office ang agresibo nga pagmaneho sa mga kabatan-onan, ang tamhang nga pagmaneho, ang pagpadagan bisan wala sa kondisyon ang sakyanan, sobra nga pagpakusog, pagmaneho nga nahubog, wala mapahiluna nga pagsaylo, kalit kalit nga pagliko u gang pagpakusog sa guba nga kadalanan ang kanunayng rason sa disgrasya.
Sa laing bahin, sa mga kalungsuran nga labing delikado sa mga motorista ug pedestrian, ang Tubigon ang naa sa numero uno.
Sa milabay nga tuig, mitala ang lungsod sa Tubigon sa 10 lamang ka kaso sa aksidente sa kadalanan, butang nga mingsulbong ngadto sa 64 niadtong miaging semana. Dinhi, nadugang ang 54 ka aksidente sa 2022 kon itandi sa 2021.
Ang Dauis maoy ikaduha nga labing kuyaw kay kung sa 2021, miabut og 58 ang mga aksidente sa ilang kadalanan, ming 98 na karon.
Sa Tagbilaran, gikan sa 227 ka aksidente sa 2021, 252 na ag natala taman sa Agosto 24, 2022 human napun-an og 25 ka aksidente ang natala didto.
Sa Loon, sa 2021, 29 ka aksidente sa kadalanan ang natala, mingabut or 72 na niadto pang usang semana taman.
Sa Jagna, 16 ang nadugang sa ilang natala nga aksidente sa kadalanan niadtong 2021, kay may 64 na sila ka kaso karon.
Sa Ubay, 15 na usab ka aksidente ang napuno sa 72 ka kaso naidtong 2021, ug naa na sila sa 87 ka TRI karon.
Ang Panglao nga kanhi may 60 ka kaso sa TRI, 71 na sila, upat pa ka buwan ang labangon aron makasugakod sa 2022. (RAHC/PIA_7/Bohol)
