By Rey Anthony Chiu | 11:17 AM June 28, 2022

Mapalit didto sa nataran sa buhatan sa National Irrigation Administration (NIA) ang mga presko ug barato nga mga utanon ug lagutmon, tanyag sa mga sakop nga irrigators sa nasampit nga buhatan. 

Ang lab-as nga mga utanon ug lagutmon, ibaligya gikan Hunyo 27 ngadto sa Hunto 29, atul usab sa kasaulogan sa buhatan sa ilang ika 59 ka tuig sa iyang katukoran. 

Ang NIA namugna ubos sa RA 3601, nga napabag-o sa Presidential Decree (PD) 552 ug PD 1702 ug natahasan sa pagtuki,pagtuon, pag-ugmad sa tanan nga mahimong tinubdan sa ikapatubig sa mga basakan ug katamnan, lakip na ang pagdesinyo, mpagpabarug ug pag-ugmad sa tanang mga gisaligan sa pagpatubig ug mga estrakturan kalabut niini. 

Natahasan usab ang NIA sa pagpadagan, pagmintinar ug pagdumala sa tanan nga nasudnong sistema sa patubig, pagdumala sa pagpadagan niini, pag-ayo ug pagtutok sa pagdumala sa tanan nga communal ug pump irrigation systems nga napatukod, napaugmad, napaayo ilabi na gayud kon gigamitan sap undo sa kagamhanan. 

Apin na usab sa ilang buhat ang pagtugyan sa pagdumala sa mga nasudnong sistema sa patubig  ngadto sa mga koooperatiba ug kahugpungan sa mga mag-uumang miganit sa panubig. 

Gawas pa niini, sila isab ang ahensya nga gitahasan sa pagpaningil sa mga balayranan sa paggamit sa serbisyo sa tanang panubig nga gitukod sa iyang administrasyon aron makabawi sa galastohan sa pagtukod, pagmintinar ug pagpahiuli sa nasampit nga mga estraktura. 

Aron sa pagtimaan usab sa iyang anibersayo, gipaidunggan dili pa lamang dugay ang mga empleyado nga nakaalagad na sa NIA sa 10 ka tuig ug labaw pa. 

Lima ka trabahante sa Bohol Integrated Irrigation System (BIIS), 7 sa Bohol-Cebu-Siquijor-Irrigation Management Office (BCS-IMO) Bohol Office, 4 sa BCS-IMO Cebu Office, 5 sa Negros Oriental Satellite Office, ug 10 ka empleyado sa Regional Office midawat og plake gikan sa NIA Region 7 agi og pagpasalamat sa ilang serbisyo nga gihatag.

Si NIA R7 Acting Regional Manager Engr. Reyne B. Ugay miaghat pa usab sa mga empleyado sa pagpaningkamot pa aron makab-ot ang taas nga productivity. 

“Sa atong mga awardees, hinaot unta sa nagkadugay ta sa serbisyo magkadako usab ang atong kadasig ug paningkamot para sa ahensya” 

Modawat usab, matud pa ni Engr Ugay og cash incentive ang mga nasampit nga empleyado. (rahc/PIA-7/Bohol) 

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.