By Rey Anthony Chiu | 07:17 PM June 14, 2022

Alang sa nasudnong pagtimaan ug paningkamot nga mapalapad ang kasayuran kabahin sa panginahanglan sa himsug ug askil nga kabataan alang sa mas lig-on nga nasud, migahin ang kagamhanan ug dul-an sa P55 milyones alang sa padayon nga pagpanglimbasog aron kahatagan ang mga kabataang Bol-anon sa saktong nutrisyon. 

Kini aron modaku nga himsug ug askil ang mga kabataan nga may igong pangutok, kay namatikdan na nga angkatinlingban nga himsug, mas dako ang abut niini sa produkston ug pagsagubang sa kinabuhi. 

Kini usab maoy gipaambit sa nutritionist ug dietitian sa DSWD, atul sa gihimong Regional Information Officers’ Briefing didto sa Panglao Blue waters sa imaging semana. 

Ubos sa Early Childhood Care and Development Program sa kagamhanan, gipatuman sa Department of Social Welfare and Development (DSWD) ang Supplemental Feeding Program (SFP) pinaagi sa paghatag og init nga pagkaon, dugang sa regular nga gikaon sa bata sa ilang panimalay. 

Matud ni DSWD Nutritionist ug Dietician II Mark Jundale Tan, ang paghatag sa libreng pagkaon pinaagi sa init nga pagkaon nga itanyag sa panahon sa ting-pamainit o tingkaon sa bata molanat sa 5 ngadto sa 7 ka adlaw sulod sa 120 ka adlaw. 

Gani, dugang niya, sa Feeding Cycle 12 sa 2022 nga pagpatuman, gilakip nila, gawas sa 2-3 anyos nga Children ubos sa Supervised Neighborhood Playgroups, ang 3-5 anyos nga bata nga nahaaipl sa Child Development Centers. 

Sa Central Visayas, taho ni Tan nga may target sila nga 134,637 ka bata nga benepisaryo sa init nga pagkaon ug lain pa nga 18,393 ka bata nga hatagan usab nila og gatas. 

Niini, dinhi sa Bohol, sa 48 ka local government units, 30,448  ka kabataan ang gitarget sa init nga pagkaon ug 12 ka LGUs o may 3,625 ka benepisaryo sa gatas. 

Sa tag P15 ang matag plato sa init nga pagkaon alang sa 30,448 sulod sa 120 ka adlaw, molanat sa P54, 806, 400 ang gipahat sa kagamhanan alang niini nga programa. 

Sa laing bahin, sa tag P19 ang matag pagpa-inum sa gatas sa mga  3.625 ka bata sulod sa 120 ka adlaw, moabut na ang kinatibuk-ang pahat ngadto sa P8,265,000. 

Kon sumadahon, kinatibuk-ang P63,071,400 ang pahat alag niining duh aka dagkong programa nga gipatuman sa DSWD alang sa Bohol lamang. 

Ang Supplemental Feeding Program sa kagamhanan magsugod sa Julyo 31 ngadto sa Nobyembre 27, 2022. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.