By Rey Anthony Chiu | 09:44 AM February 19, 2022

Karon, pwede na gyud maestorya nga ang mga puya nga gipakatawo gikan sa inahan nga nakakakompleto na sa bakuna, may nakapita nga mas lig-on nga panalipod batuk sa virus, kon itandi sa anak sa walay bakuna.

Gani, sa usa ka pagtuon sa United States Centers for Disease Control and Prevention, napakita nga ang mga bata nga gihimugso sa nagmabdos nga gikabakunahan batok sa coronavirus disease, adunay mas dyutay nga tsansa nga maospital tungod sa grabe nga Covid.

Sa usa ka pagtuon nga gihimo kalabut sa 379 ka mga puya nga nag-edad og zero ngadto sa unom ka buwan nga naospital gikan sa Hulyo 2021 nagdto sa Enero 2022, napakita nga ang mga bata nga wala pay unom ka buwan kang kinsang inahan, bakunado, mas dyutay ang tsansa nga maospital tungod sa Covid.

Dugang pa, 84% sa mga puya nga na-ospital tungod sa Covid gihimugso gikan sa ginikanan nga wala mabakunahi sa iyang pagbuntis.

Gani, ang usa ka puya nga apil sa pagtuon nga namatay, gipanganak siya sa inahan nga wala mabakunahi.

Dugang sa pagtuon nasayran nga sa mga ginikanan nga nakakompleto sa bakuna sa katapusang mga buwan sa pagbuntis, mas napanalipdan kon itandi sa nabakunahan sa unang mga buwan sa pagmabdos.

Kini hinuon nga mga resulta, una na nga gitagna, kay ang pagtabok sa mga antibodies subay sa inunlan sa pagmabdos ug sa pagpasuso sa bata sa inahan human dayon sa pagkahimugso, maghatag sa mas lig-on pa nga panalipod sa bata.

Apan, kini nga hugon-hugon, wala’y tataw nga suporta sa kasaligang pagtuon, hangtud karon.

Niini, bisan kuwang pa sa pruweba kon kanus-a gyud ang labing maayong higayon sa pagpabakuna sa mabdos, matud pa sa mga eksperto, bisan kanus-a kay ang importante, mabakunahan. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: