By Rey Anthony Chiu | 08:36 PM January 25, 2022

Sa dinalian nga panginahanglan nga mapa-apudapod ang magamit nga korente sa mga lugar sa Bohol, 13 ka adlaw sa ilang gitagal, napasumpay na sa National Grid Corporation of the Philippines (NGCP) ang nabugto nga linya sa supply sa korente nga magdala og 69KV ngadto sa Carmen.

Kini nagkompleto sa mga linya nga makapalapus sa korente nga gikan sa Ubay ngadto na sa Tagbilaran ug pipila ka mga dapit nga buot makakorente gamit ang temporaryong supply gikan sa Power Barge 104 nga gigaid sa pantalan sa Tapal Ubay.

Nahibalik ang korente sa katapusan nga 69kV transmission line nga giwisiwisi ug gilampurnas sa bagyong Odette human makompleto ang Ubay-Trinidad-Carmen 69kV line nga maghatud og dugang suplay sa korente sa mga dapit nga gialagaran sa BOHECO I ug BOHECO II niadtong alas 11:19 sa buntag, Enero 18.

Matud pa sa NGCP, kini nakompleto human nila gamita ang kapin sa usa ka libo ka lineman, engineers ug mga trabahante nga naghatag og suporta sa pagtrabaho aron mapadali ang pagpakatay pagbalik sa korente ngadto sa mga substations sa Boheco 1, Boheco 2 ug sa Bohol Light Company Inc.

Kini 13 ka adlaw nga nasayo sa una nga gisaad sa NGCP nga apson ang pagbalik sa korente dinhi sa katapusan sa Enero.

Sa pagkakaron, segun sa pahayag sa NGCP, kasamtangan na usab nilang gitrabaho ang nahibilin nga duha ka 138kV lines nga maoy kutay sa korente nga agian sa gahum dagitab gikan sa nasudnung grid nga maga agi sa Leyte.

Kini nga kutay karon kasamtangan nga putol tungod sa pagkahagsak sa duha ka higanteng tore nga gikabodan sa linya gikan sa Submarine cable ngadto sa Tapal Ubay gikan sa Popoo isla sa Pitogo, nga maoy dugokan sa gahum dagitab sa Bohol.

Kasamtangan nga anaa na sa 26MW ang korente nga nagamit sa Bohol sa pagka karon, ang labing dako nga temporaryong gahum dagitab, gikan sa PB 104 nga gidesinyo sa paghatag og 32 MW apan naghatag sa dyutay pa nga pudyot sa iyang gahum.

Moabut sa 91MW ang kinatibuk an nga panginahanglan sa Bohol ug wala pa sa katunga ang mahatag niini karon nga wala pa ang suplay gikan sa Leyte.

Gipasalig sa NGCP nga padayonon nila ang pagpahiuli sa mga apektadong transmission lines sa labing dali nga panahon pinaagi sa pagpakig alayon sa mga pundok aron maseguro nga mabuhat nila nga luwas ang ilang gipanumpaan nga trabaho. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.