By Rey Anthony Chiu | 08:48 AM January 21,2022

Dili una pwede nga mamalit og dinaghan nga tambal sa hilanat, sip-on ug ubo.

Kini aron pagseguro nga may igo nga magamit ang kadaghanan nga nanginahanglan, ilabi na sa nagpadahon nga pagpanghasi sa Coronavirus disease (Covid-19) ug sa kasagaran nga epekto sa kalit nga pag-usab sa panahon nga ang amihan nagdalag lahi nga kabugnaw nga gikan sa mga nasud nga may natunaw nga niyebe.

Dala niini ug sa pagseguro nga walay mag-ako-ako og pangumpra sa mga batakang tambal, nagpagawas ang Department of Health (DOH) ug Department of Trade and Industry (DTI) sa usa ka Joint Memorandum Circular (JMC) No. 22-01.

Kini nagpahiluna sa pamaagi hangtud pila lamang ang kadaghanon sa pwede paliton ng Paracetamol, Phenylephrine hydrochloride, Carbocisteine, ug Chlorphenamine Maleate Paracetamol.

Segun sa JMC, 20 lamang ka paracetamol nga 500 mg ang pwede paliton matag usa o 60 ka tabletas sa matag panimalay. Sa 120mg per 5 ml suspension nga 60 ml bottle, 5 lamang ka botelya ang labing daghang mapalit o 10 ka botelya sa matag banay. Kini parehas usab sa 250mg per 5 ml suspension sa 60 ml nga botelya.

Sa Phenylephrine hydrochloride, sa chlophenamine maleate paracetamol, ang 2.5 mg 500 mcg per 125 mg per 5 ml suspension sa 60 ml bottle, 5 lamang ka botelya ang kinadaghanan nga mapalit matag usa o 10 ka botelya matag banay. Sa 10 mg per 2 mg mga 500 mg tablet, 20 lamang ang kinadaghanang pwede paliton o 60 sa matag banay.

Sa carbocosteine, sa 500 mg nga kapsula, 20 ang labing daghang paliton o 60 sa matag banay. Sa 500 mg per 5ml suspension nga 60 ml nga botelya, 5 ka botelya o 10 ka botelya matag banay. Sa 200mg er 5 ml suspension sa 60 ml nga botelya, 5 ang kinadaghanan nga mapalit o 10 sa matag banay lamang.

Niini nga JMC gimanduan usab ang mga retailers ug parmasya sa pagpaskil sa tataw nga lugar sa ilang pwesto niining pahibaw, alang sa kasayuran sa tanan.

Gipahibaw usab sa nahisgutan nga JMC nga subay sa patakaran, gidili usab ang pagpamaligya sa mga nahisgutang tambal sa online. (rahc/PIA7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.