By Rey Anthony Chiu | 07:28 PM December 02, 2021

Sugod Disyembre 1 hangtud sa Disyembre 15, 2021, magamit na ang mga kondisyones nga gilatad alang sa mga bakunado nga mga tawo nga nagagikan sa mga nasud nga wala na magkinahanglan pa og visa, nga mosulod sa Pilipinas.

Ang mga kondisyones mao ang mosunod: kinahanglan sila naghupot og mga valido nga passport nga may nahibilin nga unom ka buwan sa iyang pag-abut ug aduna na siyay dala nga ticket pa-uli o paingon sa sunod nga nasud nga iyang bisitahon.

Kinahanglan usab nga sa wala pa siya moabut sa Pilipinas, gikinahanglang nagagikan lamang siya sa mga nasud nga nalista nga green country o territory sa labing ulahing 14 ka adlaw.

Gikuinahanglan usab niya nga makapakita sa timailhan o kamatuoran nga siya bakunado na batok sa coronavirus disease (Covid-19) nga gidawat sa IATF sama sa World Health Organization (WHO) International Certificates of Vaccination and Prophylaxis; VaxCertPH; o ang nasudnong digital certificate sa pagbakuna nga midawat usab sa VaxCertPH.

Niini, isip giya sa mga tinugyanan, segun sa Inter Agency task Force sa ilang Resolution No. 150-A, niadtong Nobyembre 25, 2021, isipon lamang nga bakunado ang tawo kon may labing menos duha ka semana na ang milabay human niya makuha ang ikaduhang tupokan sa bakuna o duha ka semana human mabakunahi sa Johnson ang Johnsons.

Kinahanglan usab nga ang bakuna nga iyang gigamit, kadto lamang mga bakuna nga adunay nahuptan nga Emergency Use Authorization (EUA) List o Compassionate Special Permit (CSP) nga gipagawas sa Philippine Food and Drug Administration; o nahaapil sa Emergency Use Listing sa WHO.

Sa tanang mga tugpahanan ug pantalan sa nasud nga modawat sa international nga byahe, ipatuman gihapon ang pagpangayo sa negatibo nga resulta sa RT-PCR nga gikuna sulod sa 72 oras sa dili pa mogikan ngadto sa Pilipinas, aron wala nay kwarantina sa ilang pag-abut nganhi.

Hinuon, gimandun usab ang byahedo sa pag bantay sa ilang kaugalingon sulod sa 14 ka adlaw sa iyang pag-abut, aron makataho dayun kon may lain nga gibati.

Sa mga bakunado na unta apan wala makasubay sa RT-PCR test sa wala pa mogikan sa nasud nga gigikanan, ipailawom sila sa mga protocols alang sa mga wala pay mabakunahi nga gikan sa Green List countries/ territories/ jurisdictions sama sa pagpalaming kanila sa facility-based quarantine hangtud mogawas ang resulta sa RT PCR human sa ilang ika lima ka adlaw gikan sa ilang pagtamak sa Pilipinas. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.