By Rey Anthony Chiu | 10:54 PM October 28, 2021

Hangtud Oktubre 27, 2021, mikamang na ngadto sa 17.24 % sa mga Bol-anon nga nakakuha sa kompleto nga panalipod batok sa coronavirus disease pinaagi sa pagpabakuna. 

Kini maoy taho nga gipaambit sa Bohol InterAgency task Force on the management of Emerging infectious Diseases (BIATF) subay usab sa datus nga gipaambit sa Bohol Emergency Ooeraqtions Center. 

Mikabat na sa 240,430 na ka mga Bol-anon ang nakakompleto sa ilang proteksyon batok sa Covid-19, halos walo ka buwan human una nga nakasulod sa Bohol ang bakuna nga mokontra sa Covid-19. 

Niini, lain usab nga 238,165 ka mga Bol-anon ang nakakuha sa unang tupokan sa bakuna, ug milaum nga us aka buwan gikan karon, laing 182,131 ang makadawat na sa ilang ikaduhang tupokan sa bakuna. 

Kon matuman na kini, makab-ot na sa Bohol ang 34% nga vaccination accomplishment. 

Hinuon, 70% pa ang gitarget sa Bohol nga bakunahan sa iyang kinatibuk-ang populasyon. Kon makaabut sa 34% sa sunod buwan, kini halos katunga pa sa tumong sa Bohol nga bakunahan ang 976,030 ka mga Bol-anon.  

Sa walo ka buwan usab, mikabat na ngadto sa 740,932 na ang kadaghanon sa mga bakuna nga nahidangat dinhi, mga bakuna nga Sinovac, AstraZeneca, Sputnik V, Pfizer, Moderna, Sino Pharm ug ang single dose nga Jonhson and Johnsons.  

Kon wala nay lain pang bakuna nga mahidangat dinhi sa Bohol hangtud sa sunod nga buwan, mosagunto na usab ang pamakuna. 

Kini tungod kay kon ang nahimiling gitipigan nga bakuna, kuhaan pa sa ika duhang dosage sa mga naka first dose na, anaa na lamang sa 80 mil ka vaccine shot ang mahibilin sa Bohol. 

Niini, mas milapad ang panginahanglan nga makakuha ang Bohol sa labing dali nga panahon sa dugang bakuna alang sa programa nga panalipod sa iyang katawhan. (rahc/PIA-7/Bohol) 

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.