By Rey Anthony Chiu | 03:01 PM October 06, 2021

Tabangan ni Lila Mayor Arturo “Jed” Piollo ang mga nang-ilad sa P40 milyones nga ripa, pinaagi sa pagpahilina sa ilang kaso ngadto sa National Bureau of Investigation (NBI) , kay kini us aka large scale swindling.

Si Mayor Piollo, kinsa usa ka abogado, mibutyag nga nakadawat siya og hangyo sa mga taga Lila sa pagtabang nga mahibalik ang ilang kwarta nga gipamuhunan sa ripa, apan diay, nailad ra.

“Ang akong kinasing kasing nga tabang sa tanan nga mga biktima niining maong large scale swindling, mao ang pagpahiluna nga makab-ot ninyo ang hustisya sa mga tawo nga tinuod nagpahimulos ug nagmugna niining dakong kadaot sa katilingban. Ako na kini nga gi coordinate sa buhatan sa NBI para mahimoan ug imbestigasyon,” matud sa Mayor sa iyang post sa social media human usab niya gisaysay sa radio ang hitabong pangilad.

“Sa tanan nga mga biktima, duol lang kamo sa opisina para ma endorse na kamo sa buhatan sa NBI para mahimoan na kini ug saktong mga lakang nga legal,” aghat sa mayor.

Akong ipasalig nga buhaton ang tanan nga makaya para makab-ot nato ang hustisya para sa tanan.

Dugang pa niini, gipahinumdom sa mayor ang mga tamdanan aron mas sayon nga ilhon ang aghat sa pamuhunan kon kini legal ba, o ilad.

Walay sayon nga kwarta, pahinumdom ni Lila Mayor Piollio, ngadto sa mga wala pa mailad sa ripahay nga milipang sa Bohol ug sa ubang mga lugar karon.

Ripa, o ripahay ang usa sa mga bag-ong matang sa ilad nga karon nagpahilak sa mga pobre nga namasin nga ang ilang gibutang nga kwarta, mapilo-pilo human sa pipila ka adlaw.

Tanyag sa mga sang-an og dila, ang ripa karon, lahi na sa ripa kaniadto nga mag-ilhanay pa ang mga nangapil ug may mga panagtigum ug pagsabut-sabut.

Si Mayor Piollo, midugang pag butyag nga daghan na nga tawo nga miduol kaniya aron magpatabang nga mahibalik ang ilang kwarta nga gipamuhunan.

Sa iyang facebook account hinuon, gipaambit sa mayor ang tambag aron makalikay sa pangilad.

“Walay sayon nga kwarta,” matud niya. Kung sayon man galing kaayo ang pagkuha sa maong kwarta sa imong pagtantsa, pasalig sa mayor, pagbantay kay illegal kana o usa kana ka pangilad.

Ikaduha, tambang niya, “ayaw kab-uta ang langit.” Kung unsa ang makaya, ikalipay na ang grasya nga gihatag sa Ginoo.

Alang sa mga namuhunan, ni mayor pa, “walay sayop kung maningkamot nga mulambo sa kinabuhi, apan himoa kini sa maayong paagi, ug sa pinaagi nga walay tawo nga matumban ug mga katungod nga malapasan.

Hinuon, sugyot sa mayor, “tagbawa ang kaugalingon sa mga butang nga dili mapalit sa kwarta susama sa gugma sa pamilya, kalinaw sa pamuyo, maayong panglawas, pakigdait sa isig ka tawo, samtang timan-I nga walay bisan piso nga madala sa pagtaliwan na pohon niining kinabuhi.

Ikatulo, matud niya, gamita ang utok. Hunahunaa og tarong kung kasaligan ba ang gitugyanan sa hinaguan nga kwarta. Sutaa kon tinuod pa nga ripa ang mahitabo? Sutaa kinsa ang mga kauban niini, ug bantayi: kung daghan na kaayo ang myembro sa ripa, dili na kana tinuod nga ripa, kung di illegal na nga kalihukan.

Ika-upat, kun itugyan ang imong kwarta para ipadagan ug negosyo, siguraduha nga legal ang negosyo, lisensyado kini ug adunay permit gikan sa mga tinugyanan sa gobyerno.

Sugid sa mayor, bisan ang maong negosyo gihimo pinaagi sa online, kinahanglan gihapon nga may permit para mapanalipdan ang katawhan sa mga ilegal nga mga buhat susama sa mga large scale swindling. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.