By Rey Anthony Chiu | 12:14 PM September 14, 2021

Napulo og lima ka adlaw sa dili pa tapuson ang pagpangrehistro sa mga botante alang sa piniliay sa 2022, gitaho sa Commission on Elections (COMELEC) Bohol nga miabut na sa 100,000 ang botante nga nadugang sa Bohol.

Didto sa Kapihan sa PIA, si Bohol COMELEC Election Supervisor Atty Eliseo Labaria mibutyag nga bisan pa kon gipangtangtang na sa ahensya nga gitugyanan sa pagpadagan sa mga piniliay sa nasud, namatikdan pa gihapon ang pagdagsang sa mga miparehistro, 15 ka adlaw sa dili pa kini tak-opan segun sa gilagda.

Gitangtang na sa COMELEC ang kapin sa 80,000 ka mga nalista nga botante nga napakyas sa pagbotar sulod sa duha ka sunod nga piniliay, kadtong namatay na, kadtong narehistro na sa laing lugar ug kadtong wala nay tataw nga records sa COMELEC, segun pa ni Atty Labaria.

Apan, bisan pa niini, miabut na sa 100,000 ang mga botante nga nagparehistro, butang nga mahimong tungod kay daghan nan ga nanguli tungod sa pandemya.

Daghan ang nanguli, apan wala na makagawas sa Bohol, ug tungod kay possible nga sa ilang pagbalik sa trabaho-an, wala na usab silay trabaho nga balikan, daghan ang mipili na lang nga dinhi na manimpalad, panahum sa abogadong election supervisor.

Gawas sa mga bag-ong nagpalista nga botante nga gikan sa Sangguniang Kabataan, daghan usab nga nagpa reactivate sa ilang pagkarehistrado, nga nakadugang sa ihap.

Apan, pahinumdom sa COMELEC, bisan pa nga nabalda ang pagpangrehistro nga gimando sa balaod, motapos gihapon kin isa katapusan sa buwan.

Kahinumduman nga dala sa mga lagda sa kwarantina, gipaundang sa COMELEC ang pagpangrehistro tungod sa pandemya ug gibalik lamang human sa pipila ka semana, apan tataw nga nakuhaan gyud ang kahigayonan sa pagparehistro aron mabansay ang katungod sa pagpili.

“Ato na nga gibalik ang pagpangrehistro human nadeklara ang kwaraentina, ug nagi, gidala na nato sa mga barangay pinaagi sa satellite registration,” matud ni Atty Labaria.

Apan, dunay pay higayon, dugang niya samtang iyang gipahibalo nga ang COMELEC magbukas gikan sa alas 8:00 hangtud sa alas 5:00 sa mga regular nga adlaw apil ang Sabado ug holidays, apan mopahuway sila sa adlaw nga Domingo.

Hinuon, mas maayo nga makig-appointment sa COMELEC aron kalikayan ang pagdungan og anha sa uban, nga magpasugod na hinuon sa pagsupak sa social distancing. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.