By Rey Anthony Chiu | 11:06 AM September 07, 2021

Pangunahan ni National Museum (NM) Director Jeremy Barns ug saksihan ni Bishop Albert Uy ug mga kaparian sa Bohol ang pagtugyan sa gipabag-o nga simbahan sa Parokya sa Birhen sa kasilak, ug ang kombento niini, Septembre 7, sa may alas 4:30 sa hapon, bisperas sa iyang kapistahan.

Ang napatukod nga simbahan itugyan na gayud human sa walo ka tuig gikan sa pagkagun-ob niini niadtong Oktubre 13, 2013, dihang ang linog nga miigo sa Bohol mipalup-og sa giingon nga labing ambongan nga simbahan nga gitukod sa mga pari ng Agustino niadtong 1855 pila ka tuig human natukod ang parokya sa mga Heswita niadtong 1753.

Nailhan usab sa pangalan nga Simbahan sa Loon, ang simbahan sa Kasilak nailhan sa progresibong arkitektura apan wala mabiya sa iyang kinatibuk-ang desinyo nga Baroque-Rococo.

Ang napabag-o nga simbahan, subay sa kasaysayan, mao na ang ikatulo nga pagtukod niini, human usa ka daku nga sunog niadtong 1850’s, mitilap sa sulod sa simbahan, gawas lamang sa atubangan nga bahin niini.

Matud pa, ang desinyo sa simbahan niadtong 1855 hinimo ni Domingo Escondrillas, hangtud nga kini nalumpag sa linog.

Simbahan nga natanyagan sa National Historical Landmark sa National Historical Commission of the Philippines ug National Cultural Treasure sa National Museum.

Niining daku nga kahigayunan ug kasaulogan, itugyan ni Dir Barns ngadto kang Bishop Albert Uy ang mga sertipiko sa pagtugyan sa napabag-o nga simbahan, lakip na ang National Cultural Treasure marker sa NM ug ang National Historical Landmark sa National Historical Commission of the Philippines.

Himoon usab sa simbahan ang rededication ug pontifical mass nga tambongan sa mga kaparian, bisita ug pili nga mga katawhan sa Loon, dala sa pagpugong usab sa dinagkong tapoktapok tungod sa pandemya.

Gipaabut nga motambong ug motimbaya sila Mayor Elvi peter Relampagos, Gob Arthur Yap, Kongresista Rdgar Chatto, ug Fr Desiderio Magdoza, ang kura sa nahisgutang simbahan. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.