By Rey Anthony Chiu/PIA-Bohol | 01:30 PM July 22, 2021
Nagpabilin nga anaa pa gihapon sa 13.67 porsyento sa kinatibuk-ang target population upat ka mga nasulod sa masterlist ipip priority groups nga bakunahan sa Bohol ang nakakuha na sa kinatibuk-ang panalipod batok sa grabe nga pagkaigo sa coronavirus disease (Covid-19).
Segun sa taho sa Bohol Inter Agency task Force on the management of Emerging Infectious Disease niadtong Julyo 18, 2021, sa kinatibuk-ang 253,146 ka mga health ug medical frontline workers, senior citizens, persons with comorbidities o may daan na nga gibating sakit ug mga gikinahanglang trabahante sa sector sa industriya ug patigayon, 34,620 pa lamang ang nakakuha sa kinatibuk-ang proteksyon batok sa grabe nga Covid human sila gibakunahan.
Sa 34,620 nga nakahuman na sa duha ka bakunahan, 25,947 niini o 74 porsyento ang mga health ug medical care workers nga nagtrabaho sa fronltline services nga gihatagag prayoridad sa kagamhanan nga unang mabakunahan sa ka delikado sa ilang mga trabaho.
Sa mga nakakompleto usab sa duha ka tupokan, 19% niini ang gikan sa mga senior citizens ug 5.7 porsyento niini ang gikan sa hanay sa mga aduna nay daan nga gimamati sa lawas.
Sa 25,947 nga mga health care workers nga nakakompleto sa duha ka bakunahan, kini 60 porsyento pa lamang sa kinatibu-ang 42,949 nga frontliners nga nahi-lakip sa nalista isip prayoridad nga bakunahan dala sa dakong risgo sa pagtakod diha sa ilang gitrabaho-an.
Sa 147,631 nga nasulod sa masterlist sa mga senior citizens nga una nga bakunahan, 6,686 pa lamang o 4.5 porsyento ang may kompleto na nga panalipod human nabakunahan sa makaduha.
Sa 31,927 ka mga persons with comorbidities nga nasulod sa masterlist, 1,987 pa lamang ang nakakompleto sa duha ka tupokan ug kini 6.22 ka porsyento pa lamang ang natibawas.
Ug gani, sa 30,639 ka mga trabahante sa mahinongdanong sektor sa patigayun, 6,160 pa lamang o 20 porsyento ang natupokan sa unang dose sa bakuna.
Hinuon, daan na nga nasayran nga ang pagkahinay sa pagpadagan sa pamakuna sa Bohol, kini dala sa hinay nga pagpang-abut-abot sa bakuna sa nasud.
Karong buwana ngadto sa Agosto, matud pa sa mga tinubdan sa nasudnong kagamhanan, nakatigum na ang Pilipinas ug igo nga gidaghanon sa bakuna nga mo sarang taman sa katapusan sa Agosto.
Sa pagklakaron, segun sa Philippine Statistics Authority, 1.3 milyones na ang populasyon sa lalawigan.
Niini, segun sa mga eksperto, kon malukop na og bakuna ang 30 porsyento o 390 mil ka tawo, makit-an na nga mopatag na ang mga kaso ug dili na mosaka pa ang mangamatay.
Kon maabut na sa 50 porsyento ang mabakunahan, magsugod na og kunhod ang mga kaso. Ang 50 porsyento sa 1.3 million, anaa na 650 mil ka tawo.
Kon makab-ut na sa usa ka lugar ang pagpangbakuna sa 70 sa iyang populasyon, makab-ot na niini ang herd immunity, dugang sa mga eksperto.
Ang 70 porsyento sa 1.3 milyones, 91 mil ka Bol-anon ang kinahanglang mabakunahan.
Sa tag duha ka doses nga kasagaran nga kinaiya sa mga bakuna nga makuha, nanginahanglan pa ang Bohol og 1.8 million ka doses alang iini.
Kasamtangan nga naa pa sa 145,312 ang kinatibuk-ang doses sa bahuna nga Sinovac, Astrazeneca, Sputnik ug Pfizer ang nadawat sa Bohol. (rahc/PIA-7/Bohol)
