By Rey Anthony Chiu, PIA-Bohol | 05:47 PM May 24, 2021

Kapin sa P 7milyones ang kinatibuk-an nga kantidad sa illegal nga drugas nga nasakmit sa mga tinugyanan gikan sa mga gituohang criminal nga nagpayuhot niini sa unang 120 ka adlaw sa tuig 2021.

Subay sa taho sa Kampo Dagohoy, ang base sa mga kapolisan sa lalawigan sa Bohol, nga mikabat sa P7,288,444.00 ang kinatibuk-ang balor sa illegal nga drugas nga kon wala pa masakmit, makakutaw og samot sa utok sa mga Bol-anon.

Sa taho nga gihatag ni Police Major Norman Nuez sa katungod ni Police Senior Superintendent Osmundo Salibo, ang labing dako nga mga operasyon sa kapolisan ug sa mga katambayayong nga bahan niini, nahitabo sa buwan sa Marso kanus-a, kinatibuk-ang 738.89 ka gramos ang nahipos nga shabu, sa Dangerous Drugs Board (DDB) street value nga mokabat sa P5,024,452.00.

Kini human usab mapapaslak sa bilangguan ang 47 ka mga akusado sa mga nagkadaiyang salaud subay sa gihimo nga 45 ka mga operations sa kapolisan.

Sa nag-una nga buwan sa Pebrero, nakahipos gihapon ang mga kapolisan ug nga kaabag nga ahensya niini sa 182.63 ka gramos nga illegal nga drugas nga may DDB street value nga anaa sa P1,241,884.00, sumala pa ni Major Nuez.

Gikan sa Pebrero 1-28, 44 ka mga nakadaiyang operations and gihimo sa mga tinugyanan sama sa Philippine Drug Enforcement Agency, Philippine national Police, National Bureau of Investigation ug mga kaalyado nga pwersa nga natahasan sa kagamhanan sa pagpakigbatok sa ilegal nga drugas.

Niini, 48 ang nadakpan ug gipangpaslak sa mga bilangguan.

Sa unang buwan sa tuig 2021, mihipos usab ang mga tinugyanan sa 76.55 gramos nga illegal nga drugas sa 23 ka operations niini.

Niining buwana, mikabat sa P520,540.00 ang street value sa drugas nga nahipos, sa 23 ka mga operations ug 28 ka mga suspetsado ang nangatanggong sa atub.

Labing gamay nga drugas nga nahipos sa mga tinugyanan sa kagamhanan bisan pa sa 35 ka operations niini nahitabo sa buwan sa Abril kanus-a 73.76 ka gramos lamang ang nasakmit sa mga tinugyanan.

Hinuon, 37 usab ka suspetsado ang napaslak sa mga bilangguan ug katunga pod gihapon sa milyon ang bili sa drugas nga nasakmit.

Sa kinatibuk-ang ihap, sa unang upat ka buwan, matud ni Maj Nuez, kinsa maoy operations chief sa kampo Dagohoy, sa 147 ka operations, 160 ang ilang nahipos nga mga nagpatigayon ug nagsige pa gihapon sa illegal nga drugas, samtang kapin sa usa ka kilo ang timbang sa shabu nga nakuha ang nahikaw sa mga badlongon sa katilingban. (rahchiu/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.