By Rey Anthony H. Chiu, PIA-Bohol | 12:57 PM November 22, 2020
Mga locally stranded individual (LSI) nga nanguli sa Bohol.

Sugod sa Disyembre 1, kon makakuha’g pag-aprobar gikan sa ilang tagsa-tagsa ka Rural Health Units (RHU) ug endorsement gikan sa ilang mayor, mahimo na nga sa balay o sa pribadong pasilidad ikwarantina ang usa ka bag-ong nasulod sa Bohol, basta nga nag-inusara siya diha sa iyang balay.

Kini sanglit gikinahanglan nga may makamonitor kanila samtang nagkwarantina ug ang Barangay Health Emergency Response Team nga natahasan sa RHU ug sa mayor maoy mohimo niini nga monitoring.

Hinuon, kadto lamang mosulod sa Bohol nga wala moagi sa Reverse Transcription Polymerase Chain Reaction test (RT-PCR Test) sa 72 ka oras sa wala pa motamak sa Bohol ang kinahanglan nga ipasulod sa pugos nga kwarantina sa 14 ka adlaw.

Sa laing bahin, 10 na lang ka adlaw nga kwarantina didto sulod sa usa ka kwarto nga gilain sa ubang nanimuyo sa balay alang ni-adtong manguli nga Overseas Filipino Workers (ROF), locally stranded Individuals (LSI) ug mosulod nga Authorized Persons Outside Residence (APOR), kon may ikapakita nga negatibo nga test results sa RT PCR nga nakuha 72 oras sa wala pa motamak sa Bohol.

Sila hinuon usab, kinahanglang makakuha og pagtugot sa RHU ug endorsement sa mayor.

Ug kadtong sa ilang pagsulod sa Bohol ug didto sa ilang aprobadong quarantine facility sa kagamhanan pa sila makapakuha og RT PCR Test, inig gawas sa resulta kon kini negatibo sa sakit, mahimo nga adto na mopadayon sa iyang 10 ka adlaw nga kwarantina sa balay, basta i-lain sila sa usa ka kwarto ug dili mosagol sa ubang nanimuyo sa balay sa kinatibuk-ang lanat sa kwarantina.

Sa kaso sa mga APOR, gikinahanglan nila nga makakuha og RT PCR Test nga dili molapas sa 72 ka oras sa wala pa sila motamak sa Bohol, ug kon negatibo ang ilang resulta, mahimo na sila nga tugotan nga modayon sa iyang tuyo apan dili na gyud maka-adto pa sa laing lugar, aron kamenosan ang iyang pagkasagol sa ubang tawo nga walay labut sa iyang tuyo.

Kon ang nahisgutang APOR, maglangan pa sa kapin sa 5 ka adlaw dinhi, gikinahanglang ipailawon siya og balik sa RT-PCR sa iyang ika lima ka adlaw nga pag-estar sa Bohol ug mopailawom sa sulod sa aprobadong isolation facility hangtud nga makakuha siya og negatibo nga resulta sa test.

Kining tanan maoy unod sa Section 5 sa Executive Order No. 54 human usab gisukip dinhi ang resolusyon sa mga mayor sa Bohol nga nagrekomendar sa bag-o nga health measures ug health protocols sa mga nanguli nga OFWs, LSI ug mosulod nga mga APOR.

Ang League of Municipalities of the Philippines Bohol Chapter mipadangat sa ilang resolusyon ngadto sa gobernador, kinsa usab misukip niini nga mga sugyot sa kabag-ohan aron mamahimong opisyal nga protocols samtang ang Bohol hinay nga nagbukas sa iyang mga pultahan sa mga nagpabiling naa pa sa gawas ug gusto na nga manguli dinhi. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.