By Rey Anthony Chiu, PIA-Bohol | 01:35 PM April 18, 2020
Kon ikaw usa ka empleyado nga wala nay trabaho o gitaktak sa trabaho, ug wala ka makapasa sa imong Social Security System (SSS) unemployment insurance claims sulod sa usa ka tuig sukad kang nawad-ag trabaho, nasayang na ang imong mahimo unta nga makuha.
Apan, kon ikaw kadtong mo-duso pa sa imong claims ug pag-abut sa usa ka tuig nga molapas na unta ang tagal niini, natunog kini sa Marso 5 ngadto sa Abril 30, 2020, may maayong balita alang kanimo.
Kini kay ang SSS, pinaagi sa Circular Number 2020-008 mipagawas sa lugway sa panahon sa pag file sa imong unemployment benefit claims.
Kini nga circular, matud pa ni SSS President ug Chief Executive Officer Aurora Ignacio, nahasubay sa SSS Comission Resolution No 207, series of 2020 ug sa Memorandum sa Executive Secretary nga naglatag sa Hugot ga mga Sumbanan sa Social Distancing Measures ug Dugang Sumbanan sa Pagdumala sa Corona Virus Disease 2019 (COVID-19).
Niini, dala sa mga gipatuman nga enhanced community quarantines (ECQ) sa daghang lugar sa nasud, nakasabut sa SSS sa kalisud sa pagpadagan sa mga papeles gikan sa trabahante nga nawad-an nag trabaho ilabi na kay gidid-an na ang pag-gawasgawas.
Subay sa Section 5 sa Rule 27 sa Implementing Rules and Regulations alang sa Republic Act No. 11199 o ang Social Security Act of 2018, dinhi gisaysay ang Prescriptive period alang sa pagpasa sa Unemployment Insurance o Involuntary Separation Benefit Claims.
Matud pa dinhi, ang claim alang sa benepisyo sa unemployment insurance o involuntary separation, kinahanglang madawat sa SSS sulod sa usa ka tuig gikan sa mismong petsa kanus-a siya nawad-an na og trabaho.
Apan sa kaso nga nahisgutan sa unahan, matud sa SSS dili nila ihikaw ang Unemployment Benefit o Involuntary Separation Claims kon ang usa ka tuig nga tagal, eksaktong natunong sa Marso 5 ngadto sa Abril 30, 2020.
Kini nga mga sakop sa SSS lakip na ang mga katabang sa balay ug Overseas Filipino Workers kang kinsa nga mga claims matunong sa nasampit nga tagal, mahimo pa nga moduso sa ilang claims hangtud sa Hunyo 30, 2020, segun pa sa SSS.
