By Rey Anthony Chiu | 02:29 PM January 18, 2020
Rajah Sikatuna Protected Landscape in Bilar town. Photo: Magsaysay Park

Alang sa kasayuran sa kadaghanan, ang Rajah Sikatuna Protected Landscape (RSPL) maoy labing dako nga kalasangan sa Bohol nga gipanalipdan sa balaod subay sa 16 ka lugar dinhi nga nahaapil sa National Integrated Protected Areas Systems (NIPAS) Act.

Pinaagi sa Presidental Proclamation No. 287, gideklara nga gipanalipdan na sa kagamhanan ang kalasangan sa RSPL nga gisawhan sa mga lungsod sa Carmen, Sierra Bullones, Garcia Hernandez, Valencia, Dimiao, Bilar ug Batuan nga may kinatibuk-an nga kadak-on nga 10,452.60 ektaryas.

Sunod sa RSPL mao ang Loboc Watershed Forest Reserve nga may 6,700.03 ektaryas nga tubig-saluran nga nagpadagayday sa Loboc River.

Ikatulo na ang Talibon Group of Islands Landscape and Seascape nga naglangkob sa mga isla sa Talibon lanat ngadto sa mga silingan nga lungsod nga may kadak-on nga 6,457.97 ektaryas.

Ika upat na ang Getafe Group of Islands and Wilderness Area and Mangrove Swamp Forest Reserve nga nagsukip sa labing lapad nga tinanum nga kabakhawan sa tibuok Asya nga may 6,453.51 ektaryas.

Ikalima ang Alejawan-Canhaway-Anibongan River Watershed Forest Reserve sa Jagna-Duero–Guindulman nga may 3,727.30 ektaryas segun sa kasayuran gikan sa Department of Environment and Natural Resources (DENR).

Ikaunom ang Cabilao-Sandingan Island Mangrove Swamp Forest Reserve o mga kabakhawan sa duha ka isla sa Loon ug Calape nga may kinatibuk-an nga 2,919.01 ektaryas.

Ikapito ang Panglao Island Protected Seascape nga naglangkob sa mga kadagatan sa Doljo paingon sa mga isla sa Pungtod ug Gak-ang nga may 2,447.54 ektaryas.

Ikawalo ang Alburquerque-Loay-Loboc Protected landscape and Seascape nga gisawhan sa Albur-Loay ug Loboc nga may 2,200.03 ektaryas.

Ika siyam ang Ubay Group of Islands Mangrove Swamp Forest Reserve nga nagsakop sa mga katunggan ug kabakhawan sa Sinadigan ug sa mga isla niini nga may 1,170 ektaryas

Ika napulo ang Inabanga-Buenavista Group of Islands Area Mangrove Swamp Forest Reserve nga may kinatibuk-an nga 1,103.72 ektaryas.
Ika napulo ug usa ang Candijay-Anda-Mabini Group of Islands Wilderness Mangrove Swamp Forest Reserve nga may 908.33 ektaryas.

Ika napulo ug duha ang Calape Group of Islands Protected Landscape Mangrove Swamp Forest Reserve nga may 792.72 ektaryas.

Ika napulo ug tulo ang Pres. Carlos P. Garcia Group of Islands Wilderness and Mangrove swamp Forest Reserve nga may 348.48 ektaryas.

Ika napulo ug upat ang Tubigon Group of Islands area and Mangrove Swamp Forest Reserve nga naglakip sa mga kabakhawan sa isla sa Cabgan, Macaas ug Tinangnan nga may 268.23 ektaryas.

Ika napulo ug lima usab ang Clarin Group of Islands Wilderness area nga may 58.62 ektaryas lamang samtang sa ika napulo ug unom: ang Chocolate Hills Natural Monuments nga may 14.002 ektaryas lamang.

Niining bag-o lamang, labing menos 6 sa 16 ka mga PAMBs sa mga nalista nga protected areas, mipalabang na usab sa susamang resolusyon pagsagop sa mga balayranan sa pagsulod ug paggamit sa mga pasilidad nga naa sa sulod sa protected areas.

Hinuon, suspendido pa ang pagpangobra sa pulta sanglit iduso pa sa PENRO pabalik nagdto sa mga PAMB ang mga resolusyon aron kapatabanan sa mga mekanismo ug polisiya unsaon, kinsa og sa unsa nga paagi makolekta ang balayranan.

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.