Ni Helen Castaño | 03:14 PM Enero 20, 2026
TAGBILARAN CITY — Mosaka ang bayranan sa kuryente sa mga konsumidor sa Bohol karong Enero human gipahibalo sa Bohol Light ang pagtaas sa residential ug commercial nga singil sa kuryente, tungod sa misaka nga generation ug transmission costs sa tibuok Visayas.
Alang sa Enero 2026, ang average residential rate misaka sa P14.13 matag kilowatt-hour (kWh), mas taas og P1.79/kWh gikan sa P12.34/kWh niadtong Disyembre 2025.
Samtang ang average commercial rate misaka usab sa P13.55/kWh, o mas taas og P1.80/kWh gikan sa miaging P11.76/kWh.
Matod sa Bohol Light, ang pagtaas sa singil kasagaran tungod sa mas taas nga gasto sa suplay sa kuryente nga nakaapekto sa mga distribution utilities sa tibuok Visayas.
Mga hinungdan sa pagtaas sa singil
Mas taas nga generation costs (WESM).
Ang pangunang hinungdan sa pagtaas sa singil mao ang misaka nga presyo sa kuryente sa Wholesale Electricity Spot Market (WESM). Sugod sa tunga-tunga sa Nobyembre, mihugot ang suplay sa kuryente sa Visayas tungod sa mikunhod nga produksyon sa pipila ka power plants. Tungod niini, misamot ang mga high-price period sa merkado, nga misangpot sa mas taas nga generation costs nga makita sa bayranan sa kuryente karong Enero.
Pagtaas sa line rental charges.
Misaka usab pag-ayo ang line rental charges—og 92 porsiyento kumpara sa miaging bulan—tungod sa hugot nga suplay sa kuryente, nga dugang nagpataas sa kinatibuk-ang singil sa kuryente.
Misaka usab ang transmission costs tungod sa mas taas nga Ancillary Service charges, nga gikinahanglan aron mapadayon ang kalig-on sa power grid ug masiguro ang kasaligan nga suplay sa kuryente.
Gipasiugda sa Bohol Light nga ang pagtaas sa singil gipahinabo sa industry-wide nga mga hinungdan ug nakaapekto sa tanang konsumidor sa kuryente. Ingon usa ka distribution utility, wala kuno sila’y gahum sa pagtakda o pagkontrol sa generation ug transmission charges, kay kini gitino sa kahimtangan sa merkado ug giaprobahan sa mga regulator, ug ipasa lamang sa mga konsumidor.
Gipahayag usab sa kompanya ang ilang padayon nga komitment sa transparency ug misaad nga magpadayon sa pagpahibalo sa publiko aron mas masabtan sa mga konsumidor ang mga kausaban sa singil sa kuryente.
