By Marisol Bo-oc, Helen Castaño | 04:47 PM October 17, 2024
Usa ka babayeng nurse ang gidunggab patay ug naangol ang usa ka utility worker sa usa ka pasyente sa usa ka pribadong tambalanan pasado
9:45 ganihang buntag, Oktubre 17, 2024.
Si Lt. Col. John Kareen Escober, hepe sa Tagbilaran City Police, niingon nga ang suspek nga si Marlito Cardines Linguis, 31, residente sa Barangay Magsaysay sa lungsod sa Sevilla, na-admit uban sa laing walo ka mga pasyente niadtong miaging adlaw tungod sa kalibanga sa Bohol Doctors Hospital nga naa nahimutang sa Barangay Bool.
Si Linguis nitug-an sa kapulisan nga di siya ganahan sa tinagdan sa nurse kaniya.kay kuno gibugalbugalan siya.
“Nabutyag sa imbestigasyon nga pagdumot ang motibo sa insidente human nadungog sa suspek ang pagbugal-bugal sa biktima nga ibilin siya sa tambalanan bisan pa sa pagbayad sa gikinahanglang bayronon sa ospital,” matod ni Escober.
Dihang mouli na unta si Linguis karong buntaga,kalit lang iyang gigunitan ang gunting ug gidunggab ang 51-anyos nga nurse nga nakaangkon og daghang samad dinunggaban nga miresulta sa iyang hinanaling kamatayon.
Ang utility worker nga giilang si Francis Mora Justiniare, 21, mopatunga unta apan gidunggab usab sa suspek.
Nakaikyas siya sa lugar ug nangayo og tabang sa mga security guards. Si Linguis gidakop ug karon temporaryong gitanggong sa custodial facility sa kapolisan alang sa tukmang disposasyon ug pagpasaka sa kasong pagpatay.
Ang ngalan sa nars wala nganli ni Escober sa hangyo sa pamilya.
Normal ra ang operasyon sa ospital human nadakpan ang suspek.
Wala pay opisyal nga pamahayag ang Bohol Doctors Hospital.
