By BIN Staff| 12:39 PM January 24, 2024
Bishops Abet Uy of the diocese of Tagbilaran and Patrick Daniel Parcon of diocese of Talibon urged the public “not to sell their signatures for mere money.”
SULAT PASTORAL ARON MAGMABINANTAYON BATOK SA MALINLAHONG PAGBAG-O SA NASUDNONG BATAKANG BALAOD
24 January 2024
“Pagmalig-on kamo ug pagmaisogon. Ayaw kahadlok kay ubanan kamo sa GINOO nga inyong Dios.” (Deuteronomio 31:6)
Minahal nga Katawhan sa Dios,
Tugoti kami sa pagtimbaya sa tanan og Bulahan Bag-ong Tuig 2024. Sa giingon sa awit, “Bag-ong Tuig, Bag-ong Kinabuhi,” kinabuhi nga tinuoray nga nagasunod sa kabubut-on ni Jesukristo nga mao ang “Dalan, Kamatuoran ug Kinabuhi” (Juan 14:6). Diha kang Kristo lamang makaplagan ang tinood nga kausaban alang sa tiunay nga paglambo ug kalipay.
Ang atong nasud gitay-og na usab karon sa mga grupo nga buot mopasiugda sa gitawag og CHACHA (o Charter Change) o pagbag-o sa atong Batakang Balaod sa nasud nga gi-aprobahan niadtong tuig 1987 human sa Edsa Revolution. Gani, sumala sa Balita sa Philippine Star niadtong Enero 10 karong tuiga, naukay ang Senado sa gitug-an sa mismong senadora nga igsoon sa atong Presidente nga aduna kunoy gihugon-hugon nga 20 milyones ka pesos nga ihatag sa matag distrito sa Kongreso nga isuhol sa mga tawo aron mopirma sa giingong “People’s Initiative” nga gikinahanglan aron pagsugod sa proseso sa pagbag-o sa Konstitusyon. Gani, adunay mga papel nga mismong atong mga kaparian diha sa mga hilit nga kaparokyahan nakakita, ug kini gisuroy sa mga kabalayan aron papirmahan. We are aware that the PETITION shall be filed with the Commission on Elections for the PROPOSAL TO AMEND ARTICLE XVII, SECTION 1 (1) OF THE 1987 CONSTITUTION THROUGH PEOPLE’S INITIATIVE.
Ang makapatingala mao nga walay gihimong konsultasyon ni bisan unsang pagpasabot sa katawhan kun unsa ang unod nianang ilang papirmahan. Gawas pa, ang papirmahan nakasuwat sa pinulongang englis ug dili basta-basta nga masabtan sa yanong lumolupyo. Kini nagpadayag lamang nga ang tawong mopirma wala masayod unsay iyang gipirmahan. Mismong mga kongresista dili moangkon nga ang maong pondo gikan sa panudlanan sa nasud. Nan, ang pangutana: asa man diay gikan ang maong dakong kantidad?
Dili na hinoon kalikayan ang pagduda nga adunay nasud, o negosyante o politiko nga nagpasiugda niini dili alang sa kaayohan sa mga Pilipinhon, ilabina sa mga kabus, kondili alang sa hinakog nga interes – sama sa posibleng pagpataas sa termino sa mga opisyales nga dili gustong magpapuli sa poder, o kaha sa mga nasud o negosyante nga buot mokontrolar sa dagan sa panalapi sa atong nasud.
Dili dautan nga konsultahon ang katawhan pinaagi og tiunay nga People’s Initiative. Apan walay klaro nga pagpasabot kon unsay bag-ohon sa balaod? Ug nganong bayran man? Mismong ubang senador ug kongresista napuno sa pagduda, nga imbis tawgong “People’s Initiative,” gitiaw-tiawan na lang hinoon kini pagtawag og “Piso Initiative.”
Dili sayop ang kabag-ohan sa bisan unsang balaod. Apan nasayod kita nga ang problema sa atong nasud dili ang atong balaod, kondili ang sayop o wala pagpatuman sa balaod. Kon dili masulbad ang pangurakot diha sa panggoberno, kon dili mahatagag igong pagtagad ang tininood nga serbisyo alang sa mga kabus, kon dili mahatagan og hustisya sa mga korte ang mga dinaugdaug ug nilupigan, kon walay kasulbaran sa mga krimen nga naghatag og kahadlok sa atong katawhan, kondili mabadlong ang ubang nasud nga buot moilog sa atong teritoryo, kondili kahataga’g pagtagad ang pag-amping sa atong kinaiyahan, ug labaw sa tanan, kon walay pagbag-o sa kasingkasing sa tawo, walay charter change nga makasulbad sa atong nagpatongpatong nga problema ilabina sa pagtaas sa presyo sa mga palaliton human sa krisis sa Covid ug tungod sa nagpadayong giyera sa ubang nasud sa kalibutan.
Busa, kaming inyong mga obispo ug kaparian, nanawagan sa tanang Pilipinong matoohon: AYAW IBUGTI ANG IMONG PIRMA PINAAGI LAMANG SA SALAPI. Paninglan kita sa mga umaabot nga mga henerasyon kon kita magpalingla. Ug dili ta kalimtan ang mga pulong sa Dios: “Pagmalig-on kamo ug pagmaisogon. Ayaw kahadlok kay ubanan kamo sa GINOO nga inyong Dios.”
Kaninyo maalagaron,
PATRICK DANIEL Y. PARCON, D.D.
Obispo sa Talibon
ALBERTO S. UY, D.D.
Obispo sa Tagbilaran
