By Marisol Bo-oc | 11:10 AM October 18, 2023
Gihimakak sa Kagamhanang Probinsyal nga ang nadakpan nga durugista bag-o pa lamang usa ka kawani sa Kapitolyo.
Sa tahu sa Provincial Media Office (Pimo),
walay “Gerald Aya-ay” nga usa ka empleyado sa Kapitolyo.
Sa sertipikasyon nga gipagawas niadtong Oktubre 17, 2023, ang Office of the Provincial Human Resource Management and Development Office walay “Gerald Aya-ay” nga nagtrabaho sa Kapitolyo.
“Kini aron pagmatuod nga, sumala sa mga rekord nga naa sa file niini nga opisina, si GERALD AYA-AY dili ug wala gayud nahimong empleyado sa Probinsiya sa Bohol,” ang sertipikasyon nagkanayon.
Si Aya-ay nadakpan sa gipahigayun nga buy-bust didto sa lungsod sa Sikatuna niadtong Domingo sa buntag, Oct. 15.
Una nang balita sa mainstream ug social media, nga si Aya-ay, 36, usa ka kaswal sa Provincial Health Office (PHO) ug nagpuyo kini sa Poblacion, Baclayon.
Siya nakuhaan og gituhuang shabu nga adunay balor nga P3,060 sa operasyon sa Sikatuna Drug Enforcement Unit.
Pipila na ka buwan ang nilabay human usa ka regyular nga kawani sa PHO ang nasakmitag minilyon nga shabu sa buy-bust sa Dauis.
