By J. Jala | 10:15 PM May 10, 2023
Dili mominos walo ka mga tinun-an ang nagpaalim pa sa usa ka tambalanan ning dakbayan human naaksidente ang ilang gisakyan nga motorela (modified motorized tricycle) niadtong Martes didto sa lungsod sa Candijay samtang paingon motambong og kasaulogan sa fiesta.
Matud sa report sa Candijay police nga usa sa mga tinun-an sa Tambongan National High School ang nikuha sa ilang motorsiklo nga walay pagtugot gikan sa iyang ginikanan nga maoy gisakyan sa iyang mga klasmet aron motambong og fiesta sa udto niadtong Martes.
Samtang naglugsong sila sa Purok 7 sa Barangay Cambane, kalit lang nawad-an og kontrol ang drayber sa iyang sakyanan ug mingdasmag kini sa bukid daplin sa karsada.
Ang mga responders sa Candijay Emergency Rescue Unit, TaRSIER 117, ug Candijay police daling mingresponde dayon sa dapit.
Ang mga responder naghatag ug emerhensiyang medikal nga pagtambal sa mga biktima sa lugar, ug pagkahuman gidala sila sa Candijay Community Hospital alang sa dugang nga medikal nga atensyon.
Sa pag-abot sa Candijay Community Hospital (CHH), gisusi dayon ang mga biktima ug gitambalan sa mga medical staff nga gipangulohan ni CCH Chief Dr. Alex Gustavos Sumera.
Tungod sa kagrabe sa ilang mga samad, ang mga biktima gi-refer dayon sa Governor Celestino Gallares Memorial Medical Center sa Tagbilaran City alang sa dugang medikal nga pag-atiman.
Duha ang anaa pa sa tandugon nga balatian.
