By Rey Anthony Chiu | 09:40 AM November 16, 2021

Himoon sa Provincial Health Office ang pagpamakuna sa mga konduktor ug driver sa Southern Star Bus Transit Incorporated karon semanaha, matud pa ni Assistant Provincial Health Officer Dr. Cesar Tomas Lopez.

Gibanabana nga 400 sa mga trabahante nga nagatanyag sa serbisyo sa transport sa nahisgutang kompanya ang nakigsabut na sa PHO alang sa ekslusibo nga eskedyul sa pagpahimutang sa ilang kaugalingon nga mga panalipod batok sa coronavirus disease (Covid-19).

Kini maoy gitaho ni Lopez, kinsa mao usab ang tigpamaba sa Bohol Inter Agency task Force on the management of Emerging Infectious Diseases dinhi.

Ang pagpabakuna sa mga nagtrabaho sa sector sa transportasyon, ilabi na sa Ceres bus nga maoy tatak sa SSBTI, usa na usab ka maayong desisyon ug positibong lakang paduol sa gilantaw sa Bohol nga mas luag, hamugaway ug mas luwas nga panakayan sa panahon sa pandemya.

Didto sa senemanang tigum sa BIATF, gitaho ni Lopez ang katikaran samtang nangandam na ang Bohol alang sa pagsalmot sa tulo ka adlaw nga dinaghang pamakuna sa Nobyembre 29-30 ug Disyembre 1, niining tuiga.

Kahinumduman nga buot sa kagamhanan nga ipabati sa mga katawhan nga ang pagpabakuna karong panahona, usa ka buhat nga nagtimaan sa pagkabayani.

Ang Nobyembre 30, gisaulog sa tibuok nasud ang Adlaw sa mga Nasudnong Bayani, ug matud pa ni vaccine czar Carlito Galves Jr., angay lang usab nga kini maoy itawag sa mga bag-ong bayani nga andam ug tagana nga mosakripisyo alang sa uban.

Dinhi sa Bohol, matud pa ni Provincial Administrator Katherin Pioquinto, ang tulo ka adlaw nga pagpamakuna maoy usa ka kahigayunan nga ang Bohol naka-apas sa iyang dako pa nga kakuwangon sa pag-abut niadtong mga buot mapanalipdan batok sa sakit.

Sa tulo ka adlaw, gitumong sa kagamhanan nga makabakuna sa 5 milyones ka tawo o 15 milyones sa tulo ka adlaw.

Sa Bohol, matud pa ni Lopez, giandam na ang mga motabang sa pagpadala sa mga bakuna sa mas daghang lugar.

Gani, dugang niya, buot sa mga motabang sa pagpamakuna nga moagi una og on the job trainiong aron mamahimong mas confident sa pagtupok ug sa mga proseso alang niini.

Gisaysay usab ni Pioquinto nga may mga LGUs na nga nanghangyo nga makapamakuna og daghan, ilabi na sa nagkadaghan na nga bakuna ug mga makahimo sa pagtupok niini.

Apan una na nga gipasabut sa Kapitolyo nga ang ilang unahon og tabang, kadtong LGUs nga menos pa ang agi sa pamakuna, bisan pa nga bag-o lang gisugdan ang pamakuna sa 12-17 anyos. (rahc/PIA_7/Bohol

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.