By Rey Anthony Chiu | 02:40 PM September 13, 2021

Hangtud niadtong Septembre 8, 2021, 149,782 pa ka Bol-anon nga anaa sa priority groups and nahatagan sa kompleto nga panalipud pinaagi sa pagpabakuna batok sa coronavirus disease (Covid-19).

Kini subay sa labing bag-o nga taho nga giluwatan sa Bohol Vaccination Operations Center nga nakabase sa Provincial Health Office, Septembre 8, 2021.

Sa susama nga taho, gibutyag sa Bohol Inter Agency task Force (BIATF) on the management of Emerging Infectious Diseases nga anaa na sa 151,096 usab ka mga Bol-anon ang nahatagan sa una nga dose sa mga bakuna nga gitaganan batok sa sakit nga gideklara na nga nakaapekto sa kinatibuk-ang mga nasud sa kalibutan.

Una nga tumong sa mga tinugyanan sa kasanihan mao ang pagpabakuna sa kinatibuk-ang 70 porsyento sa populasyon sa usa ka lugar aron makab-ot niini ang gitawag og herd immunity.

Sa Bohol, segun sa labing bag-o nga ihap sa populasyon sa Census on Population and Housing sa 2020, nga gihimo sa Philippine Statistics Authority, ang populasyon sa Bohol anaa na sa 1,394,329.

Sa nahisgutan nga ihap, ang 70 porsyento nga gitumbok, mao ang pagpabakuna sa 976,000 ka Bol-anon sa labing dali nga panahon.

Gipadayag ni BIATF Spokesperson Dr. Cesar Tomas Lopez nga, sa 70% nga populasyon nga mabakunahan, masinati na sa usa ka lugar ang pagkunhod hangtud na sa pagkawala nay kaso sa sakit, kay sa kadaghan na nga nabakunahan, wala nay kapadulngan ang kagaw.

Sa susamang higayon, gidugang ni Dr. Lopez, kinsa maoy Assistant Provincial Health Officer (APHO), nga bisan sa pagpabakuna sa 50% sa kinatibuk-ang populasyon sa usa ka lugar, masinati na sa mga katawhan dinhi ang pagkunhod sa mga kaso sa bag-ong masakit, o sa mga mamatay.

Ug kon makaabut sa 30% ang mabakunahan, gipasabut sa APHO nga mamintinar na sa usa ka lugar ang kasamtangan nga kadaghanon sa mga nasakit: wala nay bag-ong kaso nga madugang, dyutay na lang ang makalas nga kinabuhi.

Sa kasamtangan nga vaccination accomplishment sa Bohol, bisan sa 30%, magkinahanglan pa ang Bohol og makabakuna sa 418,298 ka mga residente.

Sa 149,782 nga nakakuha na sa ika duhang dose dinhi, anaa pa sa 10.74% ang Bohol sa vaccination target niini sa kinatibuk-ang populasyon.

Sa higayon nga ang nahatagan sa unang dose sa bakuna sa Bohol, mahatagan na sa ikaduhang tupokan, ang Bohol anaa pa gihapon sa 21.57% sa target niini.

Hinuon, ang Bohol kasamtangan nga nakadawat na sa 391,922 ka mga bakuna sukad niadtong Marso 6, 2021.

Kon ikadapan na ang tanan nga bakuna sa Bohol karong semanaha, anaa pa gihapon ang Bohol sa 28.10% sa pagpabakuna sa iyang kinatibuk-ang populasyon. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.