By PIA | 03:47 PM August 24, 2020
Sugod ugma pohon, Agosto 25, tugotan na sa mga tinugyanan sa Tagbilaran City ang pagsakay sa luyo sa motorsiklo, apan kini alang lamang sa mga nag-ipon og pinuy-anan.
Kahinumduman nga nagpatuman ang syudad sa Tagbilaran sa pagdili sa pagsakay sa likod sa motorsiklo diha nga gipahibalo sa Department of Transportation ug sa Department of Health ang palisiya sa social distancing.
Ang mobackride sa motor, nahimutang sa peligro kon ang driver mag-estorya ug dili makalikay ang angkas sa lagsik sa mga laway nga mahimong sakyan sa COVID-19.
Apan, karon, sa usa ka pahibaw nga gipatik sa iyang Facebook Page, si Mayor John Geesnell Yap mipasabut na sa bag-o nga palisiya sa syudad sa Backriding, apan para lamang sa mga ipon og puyo.
Sugod ugma puhon, August 25, 2020, gi allow na ang pag backride sa mga motorcycles nga walay barrier.
Hinuon, matud sa Mayor, kinahanglan nga nakasuot sa helmet nga lukop ang tabon sa nawong (full face helmet) ug naka face mask pa gayud ang duha: ang nagmaneho sa motorsiklo u gang angkas niini.
Kon pananglit, walay full face helmet, tugotan na gihapon ang duha nga mag-angkasay, basta magsul-ob sa face mask ug face shield na lamang.
Ug aron makapamatuod nga ang duha nag-ipon ubos sa us aka bubonglamang, kinahanglan sila nga magdala og proof of residency.
Mahimo nga cedula nga may nakasuwat nga address, o ID nga may susama nga home address, o sertipikasyon gikan sa mga kapitan nga ang nag-angkas, kauban sa balay sa nagmaneho.
Sa laing bahin, matud sa Mayor, sugod sa September 1, tanan nga mo sulod sa mga pangpubliko nga merkado gikinahanglan na nga magsul-ob og face shield ug face mask.
“Naka hibaw ko nga hassle ni pero para ra ni sa atong kaayohan, og kaayohan sa uban nga tawo,” panapos nga pahayag sa Mayor. (rahchiu/PIA-7/Bohol)
