By Marisol Bo-oc | 08:57 PM August 18, 2023
Gitaktak ni Philippine Ports Authority (PPA) General Manager Jay Santiago ang walo (8) ka mga opisyal sa Port Management Office (PMO)-Bohol human sila nakuhaan sa CCTV nga nag-inom sulod sa multipurpose hall sa port office niadtong Miyerkules, Agosto 16, 2023.
Matud sa tahu sa PPA, nagsaulog sa adlawng natawhan si Acting Port Manager sa Bohol nga nailhan nga si Lord Tyrone Agaton.
Base sa imbestigasyon sa PPA, gipakita sa surveillance video nga nag-party ang mga empleyado ug opisyal sa PMO Bohol Miyerkules sa gabii nga gipangulohan sa acting port manager, mga sakop sa port police, uban sa mga bisitang banda samtang nag-inom sulod sa opisina.
Apil sa gipalagpot mao sila si Acting Port Manager (APM) Lord Tyrone Agaton nga kanhi principal engineer sa PMO Western Leyte/Biliran sa wala pa nahimong Acting Port Manager sa Bohol niadtong Hunyo 1 ning tuiga, uban ni PMO Bohol Port Services Division Manager Julius Jumangit , Atty. Sherlito Columnas Jr. sa legal department, si Safety Officer Atty. Romeo Cabading II ug lima ka mga pulis sa pantalan nga ginganlan: Edcel E. Epan, Victor B. Cagulada, Mary Maricka R. Aguirre, Meljann B. Oronan, ug Emily Ross C. Tubio.
Matod ni Santiago, ang mga kurakot ug abusadong opisyal nga di kahibawo morespeto sa mga pasilidad sa gobyerno nga gihimo alang sa katawhan dili takos sa serbisyo sa gobyerno.
“Wala puwang sa pamahalaan ang mga opisyal na ginagawang inuman ang opisina, kahit birthday o anumang okasyon hindi dapat umiinom ng alak sa opisina. Dapat nga sila pa mismo ang nangunguna sa pagpapanatili ng kaayusan sa pantalan at hindi nangunguna sa pagiging hindi magandang ehemplo sa kanilang mga nasasakupan sa Bohol”, ani Santiago.
Dayun nangayo og pasaylo si Acting Port Manager ng Bohol. Depensa niya nga tungod kay nahubog na sila mao nagsayaw ug nagkanta sila sa sulod sa opisina sa sa pantalan.
Matud ni Santiago, wala namakak ang CCTV ug usa ka dakong sayup nga gihimong inuman ang sulod sa opisina kauban ang mga trabahante sa pantalan sa Bohol.
“Kahit saang anggulo mo tingnan, mali talaga eh, buti na lang mayroon tayong mga gumaganang CCTV o yung surveillance system natin sa buong pantalan na sakop ng PPA na na-momonitor natin sa head office. Patunay lamang ito na hindi tayo nagpapabaya sa ating tungkulin na ayusin ang pantalan at mga kawani nito at patunay rin ito na seryoso tayo sa pagsasaayos ng 130 na pantalan nationwide”, dugang ni Santiago.
Base sa inisyal nga imbestigasyon, ang mga lamesa ug lingkoranan sa buhatan sa PMO- Bohol nga gigamit sa mga tigom ug mga opisyal nga transaksiyon sa gobyerno gigamit sa inom ug salo-salo. Nigawas usab karong adlawa ang memorandum ni Santiago nga magtudlo og bag-ong ihulip nga port manager sa Bohol.
