Buksan sa Department of Science and Technology (DOST) ang duha ka adlaw nga showcase sa siyensya ug teknolohiya alang sa inadlaw-adlaw nga kinabuhi sa mga Bol-anon didto sa Ubay Bohol, Agosto 22-23.
Kauban ni Kongresista Erico Aristotle Aumentado ang House Committee Chairman sa Science and Technology ug sa local ga kagamhanan sa Ubay, ang DOST manguna sa kalihukan nga gihinganlan og Teknolohiya alang sa Bol-anon, (Tabo) Pag-usbaw pinaagi sa Siyensya ug Teknolohiya.
Matud ni Bohol Provincial Science and Technology Center Manager Vina Antopina, ang kalihukan mahimo nga sama sa usa ka fair o panagtabo diin mahimo nga mosalmot ang tanan aron madala ug mapakita ang mga konsepto sa siyensya ug teknolohiya sa inadlaw adlaw nga pagpanikaysikay.
Kini nga Tabo, dugang niya, maoy pagpamatuod sa atong tagline nga “Bringing Science Closer to the People.”
Sa Tabo nga magsugod sa alas 8:00 nagdto sa alas 5:00 sa Agosto 22-23, upat ka dagkong kalihukan usab ang mahimong apilan sa mga Bol-anon nga libre nga motambong.
Tua didto ang Edukasyon, diin particular nga mo-kawat sa eksena ang STARBOOKS, nga karon mahimo na nga offline ug mahimong makuhaan sa mga kasayuran sa us aka tawo nga buot mokat-on.
Didto usab ang serbisyo alang sa pagduso sa aplikasyon sa mga buot mokuha sa scholarship sa DOST samtang himoon usab ang career talks kabahin sa science and technology.
Didto usab ang showcase sa Panginabuhian diin may mga techno-demo ug livelihood training sa paghimo sa usa ka haplas nga dili duolon sa lamok, paghimo og sabon panghunaw, sabon panglaba, pangpahumok sa tela (fabric conditioner), shampoo alang sa buhok ug conditioner ug sabong panghugas.
Didto usab ang mga sesyon sa Pagpalambo sa Negosyo.
Makit-an didto ang mga lakang sa pag-upgrade pa sa mga ekipos, paghimo ug putos ug paghimog label sa mga baligya, ug uban pang mga lakang sa pagpa-ugmad sa produkto.
Gawas pa, sa TABO maghimoon nga pagpasibo sa timbang sa mga timbangan diin may pagtesting ug pagcalibrate sa nahisgutan nga timbangan.
Dungan nini, giawhag sa DOST ang mga katawhan sa pag-tambong sa TABO.
Alang sa dugang kasayuran, pangutana sa Hotline Number 0948-451-6200. Rey Anthony Chiu/PIA-Bohol