Usa ka tripolante sa usa ka barko ang nadakpan human kini masakpan ug makuhaan og duha ka sachet nga shabu sa usa ka buy bust operation sa lungsod sa Jagna, lalawigan sa Bohol, Dominggo sa gabii.
Ang dinakpan naila nga si Ruben Tabotabo, usa ka crew sa Cockaliong – MV Filipinas Cagayan de Oro kansang barko adunay biyahe matag Dominggo gikan sa nahisgutang lungsod paingon sa siyudad sa Cagayan de Oro.
Ang maong operasyon gihimo sa mga sakop sa Philippine Coast Guard Jagna, Jagna Police Station ug ang Bohol Provincial Intelligence Branch (PIB).
Gawas sa duha ka sachet, nakuha usab ang lain 1.25 gramos nga shabu nga nagbalor og P8,500 gikan sa cabin ni Tabotabo sulod sa maong barko.
Si Lt. Jr. Grade Michael John Encina nanawagan sa mga ship owners nga mopahigayon og kinalit nga inspeksiyon usab sa ilang mga barko alang sa mga posibleng nagtinir sa maong ilegal nga drogas.
