Agi og pagtimaan sa ila 24 nga Police Community Relations (PCR) Month ning buwan sa Hulyo, gihimo nga mas duol ang kapolisan sa mga kabataan ug katawhan sa Maribojoc, pinaagi sa usa ka outreach program nga gipangunahan mismo sa mga opisyal ug katawhan sa Kampo Dagohoy.
Usa ka barangay sa Maribojoc nga naa sa suok sa lungsod ug naay risgo sa kawad-on, ang Barangay Busao, gihulga usab sa pagbaha tungod sa pag-apaw sa sapa, hinungdan nga mangadaut ang anihonon, ug daghang puhunan ang madaut.
Kini nga suliran, direkta nga nasinati sa mga kabataan sa elementarya didto, sanglit ang kakuwang sa ani ug ang pagkadaut pa gani niini, maghikaw sa mga banay sa pagpalit sa mga kagamitan alang sa eskwelahan.
Usa pa, sa ka hilit sa lugar, nakita sa kapulisan nga kon ilang makuha ang suporta sa mga molupyo didto, dako na kini og ikaabag sa pagpatunhay sa kahusay ug kahapsay sa barangay.
Subay niini, nahukman sa Kampo Dagohoy pinangulohan ni Bohol Police Office Acting Provincial Director, Police Colonel Julius Cesar Gornez, usab ni Police Lieutenant Colonel Conrado Manatad, Police Senior Master Sergeant Jess Martinez, Regional Civil Security Unit 7 ug Provincial Health Service Personnel pinangulohan ni Police Executive Master Sergeant Myra Sajulga, nga adto himoon ang ilang outreach sa nahisgutan nga lugar.
Alang sa tema nga “Sambayanan, Mahalagang Kaakibat ng Kapulisan sa Pagtaguyod ng Mapayapa at Maunlad na Bayan,” gibisitahan sa mga kapulisan ang Busao Elementary School, buntag sa Hulyo 19, 2019.
Bitbit ang mga school bags nga gisudlan na nga daan sa school supplies, kapote, tsinelas, gitunol sa kapolisan ngadto sa tanan nga tinun-an sa nahisgutan nga eskwelahan.
Lain usab nga libre nga feeding activity alang sa mga kabataan didto ang nahitabo, segun pa ni PLtCol Manatad.
Ang lakang nga gihimo sa kapulisan usa laman sa daghan pa nga mga dinungan nga kalihukan nga gihimo sa mga police stations sa Bohol dungan sa PCR Month.
Gani, niadtong usa ka semana, gibitbit ni Police General Diebold Sinas ang bantugan nga Peacemakers Band gikan sa Sugbo aron moduyog sa mga Bol-anon nga ngasaulog sa Sandugo.
Ang Peacemakers band, giapilan sa mga fulltime nga mga sakop sa kapolisan, kinsa mahimo usab nga pulihan ang ilang mga armas aron magsabwag sa kalingawan sa mga komunidad.
Kining tanan, matud pa sa mga tinugyanan, maoy ilang gisagop nga mga lakang aron mas matabangan ang kapulisan sa mga patunhay sa klinaw ug kahapsay.
Kona ng ideal nga police to population ratio naa sa us aka pulis sa 450 ka sibilyan, dinhi sa Bohol, mikabat kini og us aka pulis sa kapin sa 900 ka molupyo.
Ug sa pagpakigbugno sa kriminalidad, importante nga kapun-an ang presensya sa kapulisan pinaagi sa paghangyo sa tabang sa katawhan nga ang puklis, atabangan. Rey Anthony Chiu/PIA-Bohol