Gitunol ni Senador Christopher Lawrence “Bong” Go ngadto sa mga tinugyanan sa Tagbilaran ang P30 milyones nga hinabang sa nasudnong kagamhanan alang sa pagpabarug og balik sa nasunog nga Cogon Public Market sa Tagbilaran City.

Nahidangat usab si Go aron pagdala sa hinabang sa kagamhanan ngadto sa 88 ka mga tag-iya sa mga stalls nga nanga-ugdaw dihang miulbo ang kalayo sa sunog niadtong Hulyo  10 sa kap-os tingpaniudto.

Kinatibuk-ang 125 ka stalls and na-ugdaw o naapektohan sa sunog, apan segun pa ni Tagbilaran City markets Administrator Pedrinio Besa Jr., 107 lamang ka stalls ang dihay mga display niadtong panahona kay ang uban nga stalls bisan og may nag-abang, apan wala’y abli ug wala nay namaligya niadtong pagkasunog.

IMG_20190716_124716.jpg
Si Senador Christopher Lawrence “Bong” Go (sentro) kauban sila si actor Philip Salvador ug Robin Padilla. Photo courtesy: Helen Castaño

Gawas sa P30 milyones nga hinabang, nagbitbit pa usab si Senador Go sa mga groceries, pagkaon ug gamay nga cash assistance sa mga nahitabo-an sa sunog.

Kini gikalipay sa mga biktima sa sunog sama ni Leonora Ampo, 66 nga kansang utanonan, ug capital nga sobra sa P10 mil, naangin sa pagkaugdaw.

Sa laing bahin, laing biktima nga si Lourdes Paña mibutyag nga dul-an sa P80 mil ang damyos sa iyang negosyo, apan magpaabut na lang siya nga matukod nag balik ang merkado, aron makabalik na siya og paninda.

Si Paña, wala na kapanghipos sa iyang refrigerator, tubig machine, cellphone charging station ug  mga kinontener nga bahalina, ginalon nga tuba, bugas ug mga sarisari nga baligya.

Matud ni City Mayor John Geesnell Yap II, may gipahat usab ang syudad sa Tagbilaran agi og hinabang sa mga tag-iya sa stalls nga nasunogan.

IMG_20190716_122734.jpg
Ang mga naninda sa Cogon Public Market sa Tagbilaran City.  Photo courtesy: Helen Castaño

P5 mil ang madawat sa matag usa sa 88 ka biktima gikan sa syudad, samtang gisaad usab, matud pa ni Gobernador Arthur Yap nga mohatag usab ang Bohol og P5,000 matag usa.

Didto usab ang Social Welfare and Development (SWAD) office sa Department of Social Welfare and Development (DSWD) aron sa paghatag sa naandan nga relief.

Matud ni SWAD Bohol Team Leader Rhea Marie Tubongbanua, ang matag karton sa relief sa kagamhanan may 6 ka kilo nga bugas, 4 ka sardinas, 4 ka karnenorte ug 6 ka pakete nga kape.

Sa iyang pakigpulong, gibutyag ni Senador Go nga usa lang ang iyang gi-ampo kaniadto: nga mamahimong Senador.

Karon, wala na akoy mapangayo pa, mao nga ako na nga ibalik ang tabang nga nadawat, butyag ni Go, kinsa maoy labing una nga napili nga senador nga mibalik sa Bohol  aron magpasalamat.

Si Go numero uno sa Tagbilaran ug numero 3 sa kinatibuk-ang Bohol, matud pa ni Mayor John Geesnel Yap. Rey Anthony Chiu/PIA-Bohol

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.