Kon mapatunhay, nagkaduol na ang tumong sa Bohol nga magbaton og usa  ka tawo nga may kabang-kaagan kabahin sa pagluwas sa kinabuhi sa matag balay.

Kini nga tumong gipaambit ni Bohol Provincial Disaster and Risk Reduction Management (PDRRM) Action Officer Anthony Damalerio didto sa Kapihan sa PIA.

Ug agi og pagtubag sa hagit sa PDRRM Council ug sa mga tinugyanan sa emergency medical services (EMS) sa Bohol, ang Philippine Medical Association ug ang Bohol Chapter sa Philippine College of Physicians (PCP Bohol) maghimo sa ambisyoso nga dinaghan ug dinungan nga pagbansay (mass training) sa mga katawhan kabahin sa pagluwas sa kinabuhi pinaagi sa cardiopulmonary resuscitation o (CPR).

Himoon sa Miyerkoles, Hulyo 17, duha  ka hugna sa dinagko ug dinungan nga bansay ang itanyag sa PCP Bohol dinhi sa Tabilaran, taho ni Bohol PCP Official Dr. Angelito Lechago.

Ang CPR, usa  ka dinali-an nga lakang pagluwas sa kinabuhi niadtong mga biktima nga nawad-an sa panimuot ug miundang na og ginhawa.

Segun sa mga mananambal, sa matag 60 segundos nga molabay human mawad-an og dugo nga magdala sa oxygen ngadto sa utok sa tawo, ang tsansa nga maluwas pa ang biktima, mohagsak ngadto sa 10% na lamang.

Kon pananglit maluwas man  sa artipisyal nga paagi, ang matag minuto nga walay hangin nga magtulak sa dugo aron mobilibud og hangin sa utok ug sa mga parte sa lawas, kini makapatay sa mga ugat ug mahimong maoy hinungdan sa pagka-balda sa usa  ka tawo.

Matud ni Dr. Lechago, ang CPR naglangkob sa pagdasokdasuk sa dughan ug paghatag og artipisyal nga hangin aron ipadayon ang paglibot sa dugo nga nagdala sa oxygen, ilabi na sa panahon nga ang biktima naa sa cardiac arrest.

Ang usa  ka tawo nga kalit lang mawad-an sa panimuot ug moundang og ginhawa, kini usa  ka sitwasyon nga gitawag og cardiac arrest.

Sa panahon nga molanat na og upat na minutos nga walay gibuhat nga lakang ngadto sa biktima, daku ang posibilidad nga nadaut na ang utok niini.

Human sa 10 minutos, lisud na kining buhi-on pa, segun sa mga batid sa CPR.

Dinhi, gitumbok sa mga mananambal ang kamahinungdanon sa CPR sa unang minuto hangtud na nga moabut ang EMS, ug kini mahimo lamang kon may mabansay gayud sa saktong pamaagi, butyag sa opisyal sa PCP.

Samtang ang CPR, mahimo nga dili una makapahibalik sa pagpitik sa kasingkasing nga miundang nag trabaho, ang CPR magtabang aron modagayday ang bisag dyutay nga dugo nga nagdala og oxygen ngadto sa utok ug kasingkasing.

Kini alang sa tumong nga pahinayon o pugngan ang pagkamatay sa mga ugat sa utok ug lawas aron kapatas-an ang posibilidad sa malampuson nga pagluwas sa kinabuhi ug kalikayan ang permanente nga pagkadaut sa utok.

Niini nga panahona, ang si bisan kinsa nga mabansay sa saktong buhaton, mahimong makaluwas sa kinabuhi, matud ni Lechago.

Subay niini, kauban ang Bohol Wisdom School, ang PCP Bohol manguna sa pagbansay sa mga tinun-an sa BWS sa CPR sa may alas 7:30 sa buntag sayo ngadto sa alas 8:30, Miyerkules didto sulod sa BWS gymnasium.

Sa pagka alas 2:00 sa hapon, ang mga tigbansay sa CPR sa PCP Bohol, adto na usab sa City Hall Atrium alang sa laing hugna sa pagbansay, uban sa City Disaster and Risk Reduction Management Office ubos ni Gerard Lavadia ug ni Mayor John Geesnell Yap.

Kini nga mga pagbansay patung-an sa usa  ka motorcade sa may alas 10:00 sa buntag aron ika anunsyo usab ang kalihukan nga bukas sa mga buot makisayud sa pamaagi sa sakto nga CPR, dugang ni Dr. Lechago.

Alang sa dugang kasayuran kabahin sa bansay, pakisayud gikan sa CDRRMO sa syudad. Rey Anthony Chiu/PIA-Bohol

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.