BOHOL WEATHER

Bohol Island News

Your source of reliable news and content in the island.

Kadaghanon sa pulis sa Bohol kulang gihapon—Gornez

Gisugat og suliran ug dakong hagit ang pagbukas sa paghandum sa Police Community Relations Month sa buwan sa Hulyo ning tuiga.

Sa ika-24 ka tuig nga anibersaryo sa Police Community Relations Month, minglobo na ug misamot ka dako ang police to population ratio, o ang kadaghanon sa pulis nga magbantay ug manalipod sa katawhan.

Sa Pilipinas, segun sa Philippine National Police (PNP), gikatakda nga ang sakto nga kadaghanon sa populasyon nga angay hatagan og usa  ka pulis, 450 o 1:450.

Ang Bohol, kasamtangan nga anaa’y 1,545 ka kapolisan diin 71 niini ang mga opisyal 1,454 nga mga police non-commissioned officers,  ug 199 ka non-uniformed personnel.

Apan niini nga kadaghanon, sa 1,378, 985 ka Bol-anon segun sa katapusan nga census sa Philippine Statistics Authority, mag-agi lamang sa usa  ka pulis alang sa 904 ka Bol-anon ang iyang serbisyohan ug panalipdan.

Kini nga kadaghanon sa angay nga tubagon sa matag pulis, wala pa maglakip sa mga turista ug mga transients nga mo-agi lamang sa Bohol dungan sa usa  ka adlaw nga tour.

Niini, gitumbok sa hepe sa Police Community Relations Officer sa Bohol nga si Police Lieutenant Colonel Conrado Manatad ang kamahinungdanon sa maayong relasyon sa kapolisan ngadto sa komunidad aron tubagon ang hagit .

Una na nga gitumbok ni Police Colonel Julius Cesar Gornez, hepe sa Kampo Dagohoy, nga may daku nga kakuwangon ang PNP dinhi sa Bohol, ilabi na kay daghan pa usab ang mga suliran sa mobility, armas, kapasidad sa pagtubag sa panginahanglan ug sa mismo nga ilang mga estasyonan.

Matud ni Colonel Gornez, 15 pa ka estasyonan sa kapolisan ang kinahanglang tukoron, kay may mga donasyon na sa lote nga kapabarugan niining bag-o ug standard nga duha  ka andana nga mga estasyonan sa kapolisan.

Kasamtangan nga mga squatters pa sa mga munisipyo o sa mga pribadong mga buildings ang pipila ka kapolisan, diin nahimong dako nga risgo sa seguridad ang ilang mga kahimtang, matud ni Gornez.

Laing nga 26 na ka standard nga estasyonan sa kapolisan sa kalungsuran ang napatukod na, kini kadtong ang mga Lokal nga Kagamhanan minghatag na og luna alang niini nga katuyuan.

Tulo pa usab ka lungsod sa Bohol ang wala pay nadonar nga luna alang sa katukoran sa ilang mga estasyonan.

Kini gipaila sa kapolisan nga mao ang mga kalungsuran sa Baclayon, Getafe ug Sevilla.

Bisan pa niini, aghat ni Col Gornez sa iyang mga sakop sa kapolisan, ipadayon ang tawag sa pamulis pinaagi sa kanunay nga presensya sa kadalanan aron kapugngan ang pagdaghan sa krimen, pagpkig-higala sa mga komunidad aron kon may pagsalig sila sa kapolisan, dili na lisud nga makuha ang mga suliran ug matutokan na ang mga badlongon sa katilingban.

Mensahe sa hepe sa Kampo Dagohoy ngadto sa kapolisan sa kalungsuran: palig-onon pa ang pagsalig ug pagtambayayongay sa komunidad aron mapun-an ang kaabag sa kapolisan.

Matud niya, mas mahulipan pinaagi niini ang kakuwang sa kadaghanon sa kapolisan samtang nagpaabut ang Bohol sa dugang pa’ng mga bag-ong pulis nga madestino dinhi.  Rey Anthony Chiu/PIA-Bohol

Leave a Reply

This site uses Akismet to reduce spam. Learn how your comment data is processed.

%d bloggers like this: