BOHOL WEATHER

Bohol Island News

Your source of reliable news and content in the island.

Mga biktima sa sunog sa Mandaue niabot na og 700 ka pamilya

Anaa na sa 700 ka pamilya ang natala sa Mandaue City Social Welfare Services (CSWS) office nga apektado sa nahitabong dakong sunog sa barangay Tipolo.
Matod pa ni Jessie Perez, ang hepe sa CSWS, posible pang modaghan ang maong apektado sanglit nagpadayon pa karon ang ilang gihimong rehistrasyon sa mga nasunogan.
Gani ang kapitan sa Barangay Tipolo mibana-bana nga anaa sa 1,200 ka pamilya ang nagpuyo sa tulo ka sitio nga apektado. Lakip na niini ang Basubas, Espina ug Maharlika.
Gihulagway ni Perez nga natugaw ang mga residente sa maong dapit ug wala makapangandam hinungdan nga wala gyud sila’y nasalbar sa ilang mga kabtangan.
Pasado ala una kaganihang kadlawon ang gikatahong oras sa pagsilaob sa maong kayo sa tunga-tungang bahin sa maong dapit.
Ginama sa light materials ang kasagaran sa mga panimay hinungdan nga daling mikatap ang kayo.
Si Perez nga nakasaksi mismo sa sunog mitug-an nga naglisod ang kabumberohan sa pagpawng sa kayo tungod usab sa kahagip-ot sa agianan.
Misaka sa Task Force Bravo ang nahitabong sunog.
Gani aduna pa’y ilang gikompirmar nga usa ka bata ang nawala.
Mata’g usa ka pamilya kansang balay naugdaw sa sunog makadawat og ayuda nga P10,000 gikan sa kagamhanan sa dakbayan sa Mandaue. Samtang, makadawat og P5,000 ang mga “partially burned” nga balay ug P5,000 usab alang sa katong mga nag-abang sa ilang gipuy-an.
Ipahimutang ang mga apektadong residente sa sulod sa compound sa Cebu International Convention Center (CICC) isip ilang temporaryong puy-anan.
Gibutyag usab ni Perez nga ang luna diin nahitabo ang sunog iya ang kabahin niini sa dakbayan sa Mandaue samtang ang uban private lot.
Adunay reblocking nga ipatuman alang sa luna nga gipanag-iya sa dakbayan samtang maghuwat ang mga mulupyo sa pagtugot sa tag-iya sa pribadong luna kung makabalik pa ba sila o dili.
Alang niadtong dili na makabalik, andam ang CSWS nga motabang sa mga pamilya nga gustong mobalik sa ilang mga tagsa-tagsa ka probinsya pinaagi sa ilang Balik Probinsya Assistance.
Samtang, nanawagan usab si Perez og hinabang sa publiko.
Og kon mamahimo, mga sinina ug mga hygiene kits ang ipanghatag sa mga apektadong residente.

Leave a Reply

This site uses Akismet to reduce spam. Learn how your comment data is processed.

%d bloggers like this: